DEZEMPREGU IHA POTENSIA BA INSTABILIDADE, RIHUN 500 LAIHA SERVISU

JOSEFA PARADA – SUARA TIMOR LOROSAE – 28 abril 2011

DILI — Dezempregu futuru bele sai hanesan potensia boot ida ba iha instabilidade, bainhira go­ver­nu laiha politika ida diak hodi kria kampu servisu iha rai laran.

Konflitu entre grupu artemarsiais nebe dala barak mosu iha  iha rai laran, sempre liga ho problema dezempregu, maske ne hanesan hipoteza ida, maibe asuntu dezempregu labele konsidera hanesan buat  nebe la vale.  Nunee sai hanesan reponsabilidade governu atu buka nia solusaun.

Direitor Fundasaun Mahein (FM), Nelson Belo hatete, desde  TL hetan nia restorasaun independensia 2002, problema dezempregu sai ona kestaun ida ne’ebe seriu ba governu, tanba numeru dezempregu aumenta ba bei-beik, maibe laiha kampu servisu, nunee hamosu deskontente no frustradu ba dezempregu sira.

Maske  nunee too agora seidauk iha dadus fiksu numeru dezempregu iha TL,  maibe tuir estudu ka peskiza  ne’ebe hala’o husi Sekretaria Estadu Formasaun Profesional no Empregu (SEFOPE) 2009-2010, konsege diskobre ona numeru dezempregu iha TL  hamutuk rihun 600 resin.

Dezempregu  sura husi idade tinan 15 ba leten,  tuir rezultadu sensus 2010 hatudu katak total populasaun hamutuk milaun ida resin, maioria joven ho idade 15 ba leten ne’ebe mai husi distritu sanolu resin tolu.

Husi numeru  hirak nee  maioria dadaun buka servisu  iha kapital Dili, tanba sidade Dili hanesan kapital nasaun ne’ebe fasil atu hetan servisu, maske realidade hatudu oin seluk.

Problema dezempregu, ou  juventude ka ema nurak sira iha sidade Dili  tuir avaliasaun pobreza/Poverty Assessment estima hamutuk 43% iha 2001, numeru ne’e iha probabilidade atu sai bo’ot liu,  tanba tinan-tinan produs dezempregu  kuaze nain 15.000-20.000, enkuantu  merkadu servisu ba mane 13% no feto 9% deit.

Tuir availiasaun nee indika mos katak  juventude barak mak laiha abilidade baziku ka formasaun, joven balu  para  es­tudu tanba  konflitu molok   ukun an. Lian Portugés no Inglés, ha­nesan mos impedimentu seluk ida wainhira sira hakarak hetan servisu tantu iha  governu ka organizasaun internasional sira.

Prezidente Konselhu Nasional Joventudi Timor Leste (JNCTL), Leovigildo Hornai rekoinese katak, konflitu ne’ebe mosu iha rai laran iha ligasaun ho dezempregu. Joven balu tanba laiha servisu, ransu malu hodi hemu tua iha estrada ka bairo, nunee  wainhira ema ruma provoka, fasil tebes atu hamosu konflitu. Hau hanoin governu tenke kria kampu servisu atu nune’e bele kria estabilidade iha komunidade nia let.” */car