“Rai Zumalai”, Entrega Ba Estranjeiru, PN Protesta MAP-MJ

JOSEFA PARADA – SUARA TIMOR LOROSAE – 28 abril 2011

DILI – Komunidade Zumalai, Distritu Kovalima hatoo keixa ba Parlamentu Nasional (PN), tamba la satisfeitu ho rai privadu 3 mil hektares, nebee governu entrega ba kompania estranjeiru no investidor Indonesia. Bazeia ba keixa nee, reprezentante povu nian iha Uma Fukun PN protesta makaas, hodi husu ba Ministeriu Agrikultura no Peska (MAP), nomos Ministeriu Justisa (MJ), atu kansela lalais.

   

Deputadu husi Bankada Fre­tilin, Joaquim dos Santos hate­ten, Konstituisaun RDTL la ad­miti atu povu lakon nia dereitu. See asuntu ida nee, Parlamentu Nasional la fo konsiderasaun, entaun reprezentante povu laiha sentidu, muito menus sentidu politiku.

“Hau hanoin laos deit sira mai aprezenta iha Komisaun A, mais nee mos iha ligasaun ho Komisaun D. Komisaun D iha ona ajenda para hare asuntu nee, para pedidu komunidade Suai-Zumalai mai PN, bele karik ur­jentimente halo kanselamentu ba projeitu ida nee,” hateten Joa­quim iha sesaun Plenaria PN, foin lalais nee.

Koalia ba asuntu hanesan, Deputadu Rui Menezes husi Ban­­kada PD, husu ba Prezidente PN atu tau atensaun liu ba iha Ministeriu Agrikultura no Pes­kas (MAP), para hatene loloos katak estadu ba hadau rai povu ninian ka sira sei halo konsul­tasaun, no see maka ba hadau no obriga.

“Hau hanoin, programa nee karik lalaika kontinua, nebee dala ida tan para iha Parlamentu nee ita hotu reprezenta povu husi teritoriu TL nee tomak. Maibe iha parte ida, oinsa haree dezen­volvimentu bele fo benefisiu ba ita nia inan aman sira,” Rui dehan.

Tuir nia hanoin, karik defaktu ba hadau sem halo konsultasaun, entaun goveru tenki hapara programa nee.

Entretantu, Deputadu Natalino dos Santos husi CNRT hateten, nia laran triste teb-tebes tanba rai 3 mil hektares nebee maka governu liu husi Ministeriu Justisa (MJ) ho Ministeriu Agrikultura no Peskas (MAP) atu fo ba konpanhia estranjerus ida.

“Ita haree katak rai tetuk sira nebaa nee atu fo hotu ba ema Indonesia ho investor sira.  Ida nee kontraditoriu ho programa governu nian atu hola traktor hodi fahe ba populasaun. Ita haree katak ita seidauk iha lei ida atu halo definisaun konaba rai,  PN sei diskuti hela. Agora governu halo kontratu ho ema estranjeirus sira no oinsa preokupasaun populasaun sira iha Suai,” dehan Natalino.

Iha fatin hanesan, Deputadu Mario Viegas Carrascalão hanoin, presiza  haree duni rai nebaa, tamba too ohin loron Timor-Leste seidauk iha lei kona ba rai loloos. “Hau hanoin, loloos nee governu kria kondisaun atu povu utiliza rai ho kondisaun nebee diak hodi hetan produsaun iha nebaa, laos fo fali ba ema estranjeiru. Kuandu povu Zumalai hola fali produsaun husi ema estranjeiru, nee ladun diak,” Mario hanoin.

Deputadu Bankada PSD nee hatutan, povu Zumalai moris ho natar no bele dehan sira kiak. See governu atu foti fali rai 3 mil hektares no fo ba ema estranjeiru mak halo programa, povu iha nebaa ba halo fali toos no natar iha nebee no sira moris ho saida?

Too nutisia nee hatuun,  STL seidauk halo konfirmasaun ho Ministeriu Agrikultura no Peskas (MAP) ho Ministeriu Justisa (MJ) ba problema rai nebee mak akontese iha Suai (Distritu Kovalima), Sub Distritu Zumalai, Suku Raimean nebee atu oferese ba kompania estranjeirus husi Indonesia. Jay