 |
| ENTREGA AAN - Abilio Mesquita alias Mausoko, Segunda (23/5), entrega aan ona ba PNTL, liu husi Servisu Investigasaun Kriminal (SIC), relasiona kazu oho Custodio iha Liquiça, foin lalais nee. Nee hanesan dalan ida atu koopera ho polisia, hodi lori prosesu nee ba oin. - FOTO: STL/ OSCAR SALSINHA |
JOSEFA PARADA - SUARA TIMOR LOROSAE
DILI – Eis membru Polisia Nasional Timor-Leste (PNTL), Abilio Mesquita alias Mausoko, Segunda (23/05), entrega aan ona ba polisia, hafoin Tribunal Distrital Dili, hasai karta kapturasaun iha Kinta-feira, semana kotuk.
Mausoko diskunfia nudar autor prinsipal nebee oho matebian Custodio, iha Liquiça, Sabadu (14/5).
Komandante Interinu Servisu Investigasaun Criminal (SIC), Superintedente Calistro Gonzaga ba jornalista sira iha nia servisu fatin, Kaikoli, Dili, informa katak, Abilio Mesquita hatudu duni komportamentu diak ba ema hot-hotu hodi koopera ho justisa. Tamba nee, nia rasik lori aan mai entrega diretamente ba SIC.
Calistro haktuir, iha Kinta-feira, semana kotuk, mandatu definitivu sai husi Tribunal Distrital Dili, atu halo kapturasaun ba suspeitu Abilio Mesquita. “Iha momentu nee kedas, depois ami kontaktu ho Abilio Mausoko, nia konkorda katak kualker tempu sei koopera ho prosesu nee. Needuni ohin loron (Segunda-red), Senhor Abilio, dader kedas mai intrega ona aan iha ami, atu bele kumpri duni prosesu nebee nia atu infrenta,” nia haktuir.
Iha fatin hanesan, suspeitu Abilio Mesquita alias Mausoko, dehan, nia entrega aan atu kumpri no responsabiliza ba hahalok nebee akontese iha Liquiça, semana liu ba.
“Hau mai hodi kumpri deit prosesu, atu oinsa lori prosesu ida nee too iha nia rohan. Tanba kazu nebee akontese iha trenamentu nia laran, needuni hau mai atu esplika loloos ba iha polisia kona ba buat nebee akontese loloos iha fatin nebee refere,” informa Abilio.
Antes nee mos, Segundu Komandante Jeral PNTL, Komisariu Afonso de Jesus, foo sai katak, aktus nebee Abilio Mausoko komete, polisia buka tuir hela. Servisu Investigasaun Criminal halo tiha ona prosesu no entrega ona ba Ministeriu Publiku.
Afonso afirma, Abilio Mausoko laos ona membru polisia, no nia hetan tiha ona despaisu demisaun iha tinan 2010 liu ba.
“Kona ba pistola nebee nia kaer hodi amiasa vitima sira iha Liquiça, ida ami seidauk hatene, tanba too oras nee, sasan (kilat) balun, ami seidauk hetan. Ami koalia dalabarak tiha ona, keta nia hetan fali iha parte seluk maka hodi ba amiasa, ida maka la hatene tuir,” Afonso esplika.
Mandatu Kapturasaun
Fonte konfirmadu husi Tribunal Distrital Dili mos haktuir, mandatu kapturasaun ba Abilio Mausoko hasai tiha ona iha Kinta-feira (19/05). Karta nee hasai, tamba Mausoko nebee diskunfia nudar autor oho ema iha Liquiça, momentu nebaa sei livre hela.
“Rekerementu nebee hatama husi Prokurador konaba mandatu de detensaun nee, mai iha tribunal nee iha dia 19 de Maio. Entaun iha oras nee kedas, tribunal hasai ona mandatu de detensaun ba arguidu Abilo Mausoko. Tamba karta kapturasaun nee tribunal entrega ona ba prokurador, entaun prokurador maka iha ona kompetensia hodi servisu hamutuk ho polisia atu ba kaptura ema nee,” fonte nee klarifika.
Kona ba kazu ida nee, Arcans Soares, nudar joven, sente hakfodak tebes, bainhira rona katak Abilio Mausoko, sei lori hela pestola. Dalabarak ema koalia katak Abilo Mausoko nee intelijen polisia nian, needuni ema lakohi halo keixa ba polisia. Agora nia oho fali ema, entaun diak liu kaer nia, sulan iha kadeia para submete ba justisa.
Nunee mos Silveiro da Costa, hateten, ema nebe lori sasan nasaun nian, hodi estraga estabilidade nasaun nee, diak liu kaer no sulan iha kadeia. “Ema nebee hakarak buka oho ema no baku ema iha fatin fatin, nee hatudu katak nian ne terorista no, tamba nee, polisia iha dereitu atu kaptura ema hanesan nee,” nia dehan. car/alm
Sem comentários:
Enviar um comentário