KAK INVESTIGA PNTL DEVE $4 MILIAUN - F-FDTL $2 MILIAUN

ACASIO PINTO – RADIO LIBERDADE DILI

Radio, online – Prezidenti Komisaun B Duarte Nunes fo sai katak oras ne'e dadaun Komisaun Anti Korupsaun (KAK) halo hela investigasaun deve husi PNTL ba kompanha sira hamutuk $4 miliaun. Nune’e mos deve husi F-FDTL iha  $2 miliaun.

"Ida ne’e importante ba povu hodi hatene durante ne’e PNTL ho F-FDTL halao knar mais deve mos barak, maske orsamentu kada tinan aprova husi PN maibe deve nafatin,”informa Duarte Nunes ba jornalista iha uma fukun PN hafoin remata halo diskuasaun ho komisaun B asuntu Seguransa-Defeza Kinta, (1/9).

Prezidenti Komisaun B hatutan, deve hirak ne’e agora tama ba KAK hodi halo investigasaun. Agora dadaun estadu selu dadaun, mais tenki nafatin halo investigasaun to’o rohan hodi hatene lolos tanba saida mosu deve barak hanesan ne’e.

Entertantu ho Komando PNTL ho Sekertario Estado Seguransa Interino Julio Thomas Pinto husu ba PNTL atu esplika konaba ezekusaun orsamentu ne’ebe aloka ona ba komando PNTL.

Konaba Portu temporariu ba ro’o patrolia F-FDTL nian, komisaun B sei bolu Diretora Aprovazionamentu DezenvolvimentuNasional, (ADN) tanba kontratu ba portu iha Hera ne’e iha ADN nia okos.

“Ami sei bolu ADN hodi esplika kontruksaun portu temporariu ne’e ninia andamentu ne’e to’o iha ne’ebe ona,”Duarte kestiona.

Iha intervista Sekertario Estadu Seguransa Interino Julio Thomas Pinto fo atensaun ba ema sira mak sunu povu nia uma iha Galitas foin lalais ne’e polisia nafatin sei esforsu buka tuir hodi kaer no prosesu ba justisa.

Sekertario Estadu Seguransa Interino Julio Thomas Pinto hato’o informasaun ne’e ba jornalista “Ema sira ne’ebe mak sunu uma iha Zumalai, Suku Galitas polisia konsege kaer balu tiha ona, nomos ema sira mak sei subar hela polisia sei buka tuir hodi kaer hotu hodi ba prosesu investigasaun idepois entrega ba tribunal hodi disidi,”Julio informa.

Julio hatutan, lori Komando PNTL mai hasoru komisaun B hodi esplika konaba orsamentu PNTL nain ne’ebe ezekuta to’o ona 67% no iha F-FDTL hamutuk 80%.

Iha biban ne’e SES interino ne’e mos aprezenta konaba alokasaun membru PNTL hodi halao operasaun hanesan iha Sub-Distritu Quelikai no Sub-Distritu Zumalai no suku Kamanasa, hodi hakalma situasuan.

“Ita nia Deputadu sira hakarak hatene klean. Konaba operasaun polisia nian, indika mos kustu orsamentu ne’ebe aloka ba operasuan nian,” dehan Julio.

Iha okaziaun ne’e, disktui konaba preparasaun PNTL hodi hasoru eleisaun jeral 2012. Tuir Julio polisia atu halao knar ho dliutan, importante mak estadu tenki prepara fasilidades ba poliisia sira, para polisia halao sira nia servisu ho diak liu.

Husi parte Defeza nian, Komisaun B husu konaba portu temporariu. “Hau espllika ba sira katak portu temporariu ne’e iha progresu ona hafoin halo  refizaun ba kontratu. Ministru Defeza Seguransa asina hodi nune’e kompanha mak kaer obra ne’e lao ona. Fiar katak iha fim de Outobru projetu ne’e bele halao ona, para ita nia ro’o 3 bele para iha portu ne’e,”dehan Julio.

Uma hamutuk 122 ne’ebe mak identifika ona hetan sunu husi ema deskoinesidu iha suku Galista, Sub-Distritu Zumalai hafoin iha grupo joven balu oho membru PNTL nomos eis Falintil Augostu Soares alis “Teki Diaz” iha dia 14 de Agostu foin lalais ne’e.

Iha fatin hanesan Komandante Operasional PNTL Eugenio Pereirra hatete, liu husi diskusaun ho komisaun B husi parte operasional nian esplika katak, area mak sai target alokasaun membru PNTL. Problemas mak orsamentu urjenti ba iha operasaun nian.

Ne’ebe rekomenda husi komisaun B dehan, ba interes nasaun ho povu nian, orsamentu ne’ebe iha presiza hasai urjenti tanba situasaun mak obriga polisia tenki halo operasaun.

“Situasaun agora dadaun ne’e ita bele dehan kontroladu ho prezensa polisia nian iha area konflitus,”nia komenta.