quinta-feira, 28 de abril de 2011

Konflitu entre Thailandia no Kambodia estraga reputasaun ASEAN nian




TIMOR EXPOSE – 28 abril 2011

Jakarta, Professor Martin Löffelholz husi Alemanha informa asuntu ne’e durante  fo nia lia-makloke iha konferensia  ba semana rua kona-ba Reporting on Regional Integration in South East Asia; History and Institution terca neé iha Gran Mahantam Hotel Jakarta Indonesia.

Martin Löffelholz salienta konflitu aberta entre membrus ASEAN nunka mosu iha dekade pasadu maib’e oras ne’e potensialidade konflitu mosu entre rai sira nebé sai membru ba ASEAN.

”ASEAN lao neineik liu atu rezolve disputa nebe nia nasaun membru sira hasoru”dehan Martin

Martin Löffelholz rekonese konflitu entre Indonesia ho Timór-Leste akontese duni iha tinan 10 resin liuba maibe konflitu ne’e nia kontestu diferente ho sitausaun atual. “uluk konflitu akontese duni entre Timór-Leste ho Indonesia maibe laos hanesan oras ne’e.”

Martin Löffelholz  mos louva ho sitausaun demokrasia no amizade iha Indonesia no Timór-Leste  no nia realsa progresu demokrasia no amizade rai rua nian bele fo enkorajamentu ba nasoens membru ASEAN seluk atu promove dame no mos hametin demokrasia iha idak-idak nia rai.

“oras nee Timór-Leste ho Indonesia sai ijemplu diak ba ASEAN tamba susesu nebe sira hetan tiha ona durante nee”.

Professor ne’e sujere atu ASEAN halao diplomasia aberta ho nasoen sira nebe’e iha konflitu atu nune’e bele rezolve iha tempu besik se lae maka esforsu ASEAN nian atu harí komunidade ASEAN nebe’e dame la sai realidade ida.

Editora ida husi Radio voice of democracy Ieng Neang hateten difisil ba Thailandia no Kambodia atu hetan solusaun pasifika tamba kada nasaun defende nia argumentu kona-ba direitu titularidade ba rai iha fronteira temple Preah Vihea.

Entretantu, konflitu entre Thailandia no Kambodia nebe’e ikus-ikus ne’e akontese resulta ema nain 10 resin mate.

Indonesia nebe’e nudar lidera prezidensia ASEAN halao tiha ona esforsu hodi sai mediador ba konflitu rai rua maibe to’o oras ne’e seidauk hamosu paktu ruma atu hakotu tiha disputa fronteira.

iha parte seluk, Timór-Leste no Indonesia mos iha ligasaun fronteira ba malu maibe governu rai rua konsege hari komisaun mista no toó oras ne’e nia progresu atinji tiha ona pursentu 90.(Felipe)

Sem comentários:

Mais lidas da semana