UDAN TUN, SIDADE DILI NAKFILA BA FATIN LISU

JOSEFA PARADA – SUARA TIMOR LOROSAE – 28 abril 2011

DILI – Udan laos hamosu deit inundasaun no hapara distribuisaun bee mos ba komunidade iha kapital Dili, maibe udan  mos destroi murak furak imajen  sidade dili nebe bonito.

Sidade Dili iha tempu udan hanesan atual, haree husi dook matak no nabilan  tebes, maibe bainhira haree husi besik, sabraut, tanba inundasaun nebe  rezulta udan produs foer bar-barak  naklekar iha estrada  no kampu laran.

“Nee seidauk aumenta estrada nebe  kuak lemo-lemo iha Dili laran,” Xefi Suku Bairo Pite, Sub Distritu Don Aleixo, Distritu Dili, Joao Batista da Costa Belo, kasu  lia hirak nee  ba STL iha ninia servisu fatin Sede Suku Bairo Pite semana liu ba.

Nia dehan mudansa klima komesa haterus  ona povu, tanba kuaze loron tomak la bele halao atividade servisu tanba deit udan la fo fatin. Pior iha bairo nebe  maioria populasaun hetan abastamentu bee mos husi  SAS hetan difikuldade boot tanba bee la suli,  eletrisidade  mate lakan.

Xefi suku nee konsidera  Governu  promete deit mak barak, maibe nunka realiza,  nunee komunidade sira barak mak lakon konfiansa ba ulun boot sira tanba la kumpri sira nia promesa.  Suku Bairo Pite iha  Aldeia 5 nebe besik liu ba iha rai hun, komunidade iha aldeia hirak nee  afetadu tebes ho ameasa natureza,  bee mos  no eletrisidade.

Iha fatin hanesan Siquita Soares hatete  nudar  ema povu ki’ik  bainhira iha udan hasoru problema  eletrisidade mate lakan, la asesu bee mos no inundasaun.

Nunee mos  Fransisco da Costa ejiji atu hadia ona drainajen iha Dili laran, tanba kauza husi inundasaun iha Dili laran, mai  husi drainajen nebe la funsiona. “Ami iha Bebora, kuandu tempu udan ona, ami tenke lulun kalsa ain, tanba  bee nakonu,” tenik Fransisco. son