PROFESOR KONTRATADU IHA DISTRITU ERMERA TUIR ORIENTASAUN

COSTA GOMES – CJITL – 24 abril 2011

Ermera flash, Relasiona ho desizaun Ministeriu Edukasaun atu aplika kontratu permanente ba profesores kontratadu, halo profesores sira iha Distritu Ermera preokupadu hodi tuir orientasaun konaba oinsa atu hatama dokumentus.

Superintendente Educasaun Distrito Ermera, Jose Maia de Deus  afirma katak Ministerio Edukasaun oras ne'e halo hela prosesu atu simu dokumentus husi profesores kontratadu sira ne'ebe atu prosesa ba permanente.

Nune'e profesores kontratadu husi Sub Distritu 5 iha Distritu Ermera hanesan Railako, Ermera, Hatolia, Letefoho, Atsabe hotu hotu preokupado atu tuir orientasaun konaba atu hatama dokumentus sira ne'be presiza.

Ba CJITL online, Marito Soares Salsinha, ne'ebe durante ne'e servisu hanesan profesor kontratadu iha Eskola Presukandario Publiku Biluli konfirma katak nia rekolha hela nia dokumentus sira atu hatama tanba nia hakarak tebes atu sai profesor permanente.

Tuir nota ministerial katak ami tenki hatama dokumentus sira hanesan Sertidao RDTL, Kartao Eleitoral ,Sertidao  Batismo, no  Sertificado  Cursu  linguagem, nebe  mak ami hetan iha tekniko professional hodi nune'e ami bele tuir teste atu sai profesor permanente ka lae” Hateten Marito.

Tuir observasaun semana kotuk iha Sekretariadu Ministerio Edukasaun Distritu Ermera nakonu tebes ho profesores kontratadus ne'ebe hakarak prosesa an sai profesor permanente.