domingo, 1 de maio de 2011

AHI MATE LAKAN, FAILA HUSI JESTAUN GOVERNU




JOSEFA PARADA – SUARA TIMOR LOROSAE – 29 abril 2011

DILI - Eletrisidade ne’ebe mate lakan iha capital Dili, hodi estraga konsumedores sira sasan elektroniku hanesan televisaun, jaleira, komputador, no sasan sira buat seluk, faila husi jestaun  governu nian.

“Governu ita haree laiha jestaun ida diak hba eletrisidade, tanba nee ahi mate lakan hela deit hodi estraga komunidade nian sasan,” Xefi Suku Kaikoli,  Hipolito Sarmento Marques kasu lia hirak nee ba STL, iha salaun ETDA, Fatuhada, Kuarta, (27/4).

Governu katak Hipolito laiha  kbiit kontrola eletridade, fo dalan ba konsumedores     balu  hodi  liga  ahi   illegalmente iha Dili laran, kauza husi hahalok hirak nee   kontribui makaas ba  ahi mate lakan  iha capital Dili.

Xefi suku nee, husu kompanha nebe manan tender hodi jere EDTL atu troka sistema prepagu ho  meteran. Tuir nia espasu boot ba konsumedores sira hodi liga ahi ilegal tanba sistema prepagu. “Durante ita uza prepagu EDTL hein deit ita ba sosa pulsa, sila kaon tiha ona kontrola, sistema meteran ba hau efetivu liu ba kontrola, tanba fulan-fulan funsionairu EDTL tun ba terenu hodi hasai numeru enerjia nebe sira uza  liu husi meteran,” nia komenta.

Maske nunee tenik Hipolita, meteran ka prepagu, kestaun tekniku nebe partensia kompetensia EDTL nia hodi haree, mas importante mak oinsa  komunidade bele  asesu eletrisidade oras 24. “Se kauza ahi mate lakan nee tanba uza ilegal, mak ami hakarak husu, kontrola EDTL nian ba ahi iha Dili nian oinsa,” tenik Hipolito.

Xefi suku nee husu garantia mos  ba sasan elektronika nebe aat kauza husi eletrisidade nebe mate lakan. Tuir nia komunidade iha nia dever selu  ona enerjia nebe sira uza, mas ahi mate lakan hodi estraga sira nia sasan husu responsabilidade ba se.

Iha parte seluk Ines Martins husi Organizasaun Naung Govermental (ONG) Lao Hamutuk hatete, komunidade atu  moris saudavel tenki   asesu be’e mos, eletrisidade, maibe  too agora governu seidauk realiza, maske dalawain ejiji bebeik.

Sekretariu Estado Eletrisidade Agua no Urbanizasaun,  Januario Pereira,  governu daudauk hatun ona  staf sira hodi  kontrola ahi iha bairo –bairo, tanba indikasaun uzu ahi  illegal makaas tebes. ‘’Ami agora kontrola  bairo- bairo hodi haree uma ida – idak, sira nebe  uza ahi  iligal ami sei  foti medidas hodi hakotu  fiu eletrisidade,” tenik Januário.
   
Emilia Sarmento konsidera  governu lakon  kontrola  ba eletrisidade  iha Dili laran, tanba nee ahi sempre mate lakan. “Ami iha parte Lahane Orental, Aldeia Damabata Besi, suku Lahane Orental, Subdistritu Vera Cruz, hasoru bebeik  problema eletrisidade no be’e mos, neduni ami  husu governu atu kontrola uzu ahi iha Dili laran.” Jef

Sem comentários:

Mais lidas da semana