MTCI SEI VERIFIKA FOS NE’EBE KUALIDADE LADIAK

JOSEFA PARADA – SUARA TIMOR LOROSAE – 29 abril 2011

DILI- Governu liu husi Ministeriu Turismu Comercio no Industria, (MTCI) oras ne’e dadaun sei verifika fos ne’ebe mak a’at no kualidade ladiak. Hodi nune’e bele fahe ba komunidade sira ne’ebe presiza.

Ministru Turismu Comercio no industria, (MTCI), Gil da Costa Alves iha Salaun Convention Center, Merkadu Lama, Dili, Kinta (28/4)  afirma katak kona ba fos toneladas rihun lima ne’ebe hetan ajudus husi China ne’ebe maka kualidade ladiak oras ne’e dadauk husi MTCI rasik sei verifika. Tamba fos ne’ebe iha dala barak balun foer no kualidade ladiak.

 Tuir Gil, bainhira fos sira ne’e sei verifika, nia fiar katak fos ne’ebe balun sei kualidade diak.

“Ita sei verifika katak kuandu atu fahe ba ema karik mos sei hare ida ne’ebe diak maka fo no ladiak,”haktuir Gil.

Gil haktuir tan katak, fos ne’ebe mai durante viazem bele foer tama, liu husi tasi nia is no dala ruma monu ne’e normal. alende ne’e laos la normal katak sasan mai ne’e 100% tenke diak hotu.

“Maibe sempre iha persentase ladiak hotu mesmu estadu rasik sosa husi rai liur hanesan sempre iha presentase que kualidade ladiak,”Gil esplika.

 Kona ba fos ne’e rasik sei halo intervensaun ba komunidade ka atu fahe direitamente, Gil konsidera ne’e lae, ida ne’e oin seluk tamba ida ne’e sira reserva ba Ministeriu solidariedade Sosial, (MSS) atu atende ba komunidade kuandu presisa. Signifika katak  fos sira hotu-hotu iha armajen estadu nian.

“ Atu armajen MTCI mak kaer ka MSS ne’e depende,  se MSS la to’o, MTCI iha posibilidade iha armajen tau iha ne’eba. Mas, ba deit MSS,”Gil esplika tan.

Purtantu Simão da Costa nudar negosiante kiik husu ba MTCI atu buka dalan oinsa para kontrola nafatin fos sira iha armajen laran. Tamba dala barak fos ne’ebe iha armajen barak maka nia kualidade ladiak.

“Sebele Governu kontinua nafatin hare tamba importante ba komunidade nia hygiene,”konfesa negosiante ne’e.

 Odete Piedade hanesan povu kiik hatete, maske fos barak mak iha armajen laran importante Governu tenke kontinua tau matan. Atu nune’e labele lori moras ba komunidade sira.

Alende ne’e, estudante Serafina Freitas  sujere ba Governu sebele fo nafatin atensaun seriu ba asuntu ne’e tamba importante ba komunidade sira liliu iha area rurais hodi konsume. vey