Parlamentu Nasional Husu Ministeriu Saude Labele Halimar ho Estudantes nia Vida

DOMINGOS SILVA - CJITL

CJITL Flash, Relasiona ho estudante husi Kuba ne’ebe mak hetan problema konaba sira nia nesesidade bajiku tanba governu tarde transfere osan subsidiu, halo deputado iha uma fukun laran moras no husu governu atu aselera lalais prosesu transferensia.

Tuir Deputadu Francisco Branco husi Bankada Fretilin katak karik informasaun ne’e mak los dunia katak estudante sira durante fulan hira nia laran ne’e la hetan subsidiu, ida ne’e katak Miisteriu Saude la iha duni planu atu tranfere osan ba estudante sira iha Kuba.

“Iha hau nia proposta iha 2010 hau dehan katak orsamentu ba estudante sira iha rai liu ne’e tenke klaru, tenke tau sistema ne’e dentru ministeriu atu nune’e la bele atraja, tanba ne’e bele afeita ema nia moris” dehan Branco, segunda 06/6, iha Parlamentu Nasional.

Nia hatutan katak se kuandu afeita sira nia moris lor-loron afeita mos sira nia estudu,no afeita mos sira nia kualidade tanba konsetrasaun la dun diak.

Governu liu Husi Ministeriu Saude la iha Planu atu tranfere osan ba ita nia estudante sira iha rai liur, halo tuir mekanismu sira hanesan trimestral ne’e bele lao diak, ne’e la afeita ba estudante sira iha rai liur.

“Ida ne’e make ma dehan planu asaun annual la klaru” nia kestiona.

Nune’e mos Deputadu Aderito Hugo husi Bankada CNRT katak tuir lolos orsamentu ne’e failansu iha ne’ebe ida ne’e mak ita bele hatene.

“Husu ba Ministru Saude Lalika halimar ho kestaun ida ne’e tanba ida ne’e fo impaktu ba ema barak nia vida” dehan Hugo.