EZISTENSIA FRETILIN MUDANSA HAMOSU POLEMIKA

JOSEFA PARADA – SUARA TIMOR LOROSAE – 29 abril 2011

DILI – Ezistensia Frente Recon­strução Timor-Leste Inde­pen­den­te–Mudança (Fretlin-Mu­dan­ça) sei problema hela ho di­rei­tu pro­pretariu sigla. Maske deklara aan sai husi CNRT, hodi ba rejista iha Ministeriu Publiku, maibe sei hein legalidade nebee mai husi desi­zaun final tribunal nian.

Tuir Deputadu Bankada Fre­tilin, Joaquim dos Santos, tribunal labele admiti sigla nebee ha­nesan. Tanba dereitu autor nee ida deit. Naran ida Fretilin nee, so militantes Fretilin maka iha de­reitu ba propetariu sigla. See ida nee maka tribunal admiti, entaun tribunal viola Fretilin nia dereitu fundamental.

“Ita respeita sidadaun hot-hotu nia dereitu politiku nebee ga­rante ho konstituisaun kona ba  liberdade atu iha opsaun politika no mos obrigasoens etika no morais. Ema ida labele kestiona sira nia li­berdade no konsiensia hodi halo op­saun politika, mas keta haluha fo res­peitu ba sidadaun nia liberdade op­saun politika, labele viola fali ema se­luk nia direitu fundamental nebee ga­ranti iha konstituisaun no lei,” ha­tete Joaquim ba STL iha PN, Kinta (28/4).

Politikamente, katak Joaquim, sira (Fretlin-Mudança, red) nia dereitu, mais juridikamente tribunal tenki haree didiak katak dereitu nee mai para atu produz efetus ba partisipasaun popular iha dezenvolvimentu politika pais ninian, ou  mosu trend sira hanesan nee mai para sai fali obstakulu ba dezenvolvimentu.

“Tribunal tenki haree didiak. Desizaun tribunal tenki garanti estabilidade politika no estabi­lidade juridika iha instituisoens demokratika Timor-Leste. Nee ita koalia ba prinsipiu fundamentais, dereitu sidadaun nian nebee ita garanti  iha Konstituisaun RDTL mos ho lei koalia konaba konsti­tuisaun partidus politiku. See laiha ideia, lalika halo halo partidu, hein ba vota deit,” dehan Joaquim.

Nunee mos Deputada Virginia Ana Belo husi Bankada CNRT hatete, Fretlin-Mudança nebee haketak husi CNRT sei laiha impaktu, tamba ida nee maka dalan diak liu atu sira hetan legalidade, nunee tuun ba baze hodi halao kampanha, ema bele fiar sira.

“Ita hot-hotu nia hakarak katak sira tenki iha legalidade ida para tuun ba baze, kuandu ba koalia, ema bele fiar sira. Ida nee ba ami, laos problema, maibe demokrasia maka ida nee,” dehan Virginia.

Liga fali ba lei, Virginia dehan, “See tribunal desidi dehan nee ilegal, ita tenki simu. See dehan legal, tenki avansa ba oin. Problema naran hane­san, maibe ho nia signifikante seluk. Atu dehan ida nee loos ka sala, so tribunal mak desidi,” katak Virginia.

Entretantu Deputadu Mario Viegas Carrascalão husi PSD, hanoin,  problema nee kuaze atu hanesan ho CNRT. Uluk CNRT mos organizasaun ida no reforma fali partidu ho ninia subtansia seluk fali. Kestaun konkorda ka la konkorda nee oin seluk, pessoalmente nia rasik la konkorda.

“Ba hau, naran CNRT ho Fretilin nee, naran istoriku. Naran istoriku ita labele  utiliza fali oi-oin deit, tamba nee naran boot. Ita tenki respeitu hotu naran sira pasadu nian nee. Agora ita tau fali rekonstrusaun nee, maibe nia singkatan Fretilin nafatin no ida fali CNRT nafatin, mai hau nee la loos. Mais pronto, tribunal simu ka la simu, nee tribunal maka disidi,” dehan Mario.

Fretlin Mudança nebee hasees aan husi CNRT, katak Mario, impaktu nee iha, tamba Fretlin Mudança wainhira sai husi Fretilin, sira lori sai sira nia massa. Nunee mos Fretlin Mudança sai husi CNRT sei lori sai mos massa. Needuni, see Fretlin Mudança nee sai husi CNRT, sei dada mos ema barak nebee durante nee tuir sira.

“Partidu CNRT barak liu kuadrus deit, maibe Fretlin Mudança nia massa too iha kraik. Impaktu iha duni, mais la boot liu,” Mario hanoin.

Mario haree katak, Partidu CNRT nee laos partidu massa nian maibe CNRT hanesan partidu situsional. Situsional, tamba moris husi situasaun ida atu halibur ema nebee sai husi Fretilin. Bazeia ba idolojia, loloos CNRT nian saida eskerda ka, dereita ka, sentru ka lae, la hatene,  too ohin sidauk haree.

Deputadu Arão Noe de Jesus C. Amaral husi Bankada CNRT, la preokupa Fretlin Mudança hasees aan husi CNRT, tamba nee dereitu sidadaun hot-hotu nian, atu harii partidu. Durante tinan 5 nia laran, hot-hotu fo apoiu ba maun boot Xanana hanesan lideransa ida nebee atu garanti estabilidade, hodi bele koopera no avansa ba dezenvolvimentu.

“Tuir hau nian hanoin,  ita koalia hamutuk nafatin fo apoiu ba maun boot Kay Rala Xanana Gusmão atu bele garanti estabi­lidade, para dezenvolvimentu nee bele lao ba oin. Mais nee dereitu ida-idak nian atu harii partidu. Harii ba, maka iha 2012, ita kompete nudar partidu,” nia hatutan. Jay