AI-HAN LAIHA NUTRISAUN, ESTUDANTE LAKON KONSENTRASAUN

JOSEFA PARADA – SUARA TIMOR LOROSAE – 29 abril 2011

DILI - Prezidenti Republika, Jose Ramos Horta hatete, programa merenda eskolar nebee halao iha eskola sira iha teritoriu Timor laran tomak, laiha kualidade. Tan­ba aproveitamentu labarik sira nian iha eskola atu sai diak, maka sira mos tenki hetan nutri­saun diak.

“Se ita tau Merenda Eskolar nebee efisiente no funsiona iha eskola hotu-hotu iha TL, publiku no privadu, hau hanoin ita bele haree iha tinan ruma nia laran, aproveitamentu eskolar sei diak liu,” deklara PR Horta ba jor­na­lista sira foin lalais nee, iha Palasiu Prezidente Nicolau Lobato-Dili.

Tuir Horta, estudante sira, laos tanba sira baruk atu estuda, laos tanba laiha kakutak maibe tanba iha uma ahi laiha, moras be­beik, tanba bee ladiak, kabun mo­ras hela deit,  saude publiku la­diak tanba susuk barak, malaria hakaas barak, nutrisaun laiha, tan­ba lor-loron han hahan nebee laiha nutrisaun diak.

“Sira nia hahan lor-loron ma­ka aifarina, etu mais naan laiha, manu laiha, ikan laiha, no buat sira nee hotu maka halo sira laiha konsentrasaun diak iha eskola,” nia dehan.

Iha parte seluk, Xefi Estadu mos hatete, atu produz joven­tu­de nebee iha kualidade maka Mi­nisteriu Edukasaun tenki esforsu hasae kualidade dukasaun, ha­huu husi Jardim Infantil, Eskola Primaria too Liceu.

“Se ita la hahuu didiak iha Jardim Infantil, hadia di-diak iha uma, too elementary school nee depois atu ba Universidade, nee difisil liu ona. Kualidade husi profesor sira, kualidade infraestrutura no kualidade livrus, laos nee deit, maibe kualidade nutrisaun,” PR Horta hanoin.

Entretantu Ministru Edukasun, João Cancio Freitas hatete, atu hasae kualidade merenda eskolar tenke depende mos ba kualidade osan. Osan kuandu barak, entaun buat hotu-hotu bele lao diak. “Ami iha osan Milaun 1,5 maibe 1,3 nee atu selu kuzinheiru. Ami iha deit 300.000 mil, agora fos iha ona, mais ami hanoin hela koto. Koto iha ita nia rai laran latoo, needuni haree took atu inporta koto husi ne­bee, ita haree tok,” hatete ME Cancio.

Cancio hatutan, ME simu duni osan boot, tinan ida nee sira iha 70 milioens maibe husi 70 miloens nee, 43 miloens ba deit salariu. Entaun sira servisu deit ho 20 ital miloens, maibe fahe ba pre eskolar too universidade.

“Ita mos iha problema barak, dalan mos ladiak. Agora deit ezem­plu, atu lori deit fos ba eskola balun deit mos dalan araska ka kotu, bee mos ladiak, infraestrutura sira nian mos latoo. Agora ita pasiensia, ita foin maka ukun aan tinan sanulu (10), uma eskola sira nebee iha 1500 besik nee Indonesia maka halo, nee mos lori tinan rua nulu resin haat maka halo. Agora ita hein katak menus iha tinan sanulu, ita atu hadia hotu dala ida nee, ita nia osan latoo,” esplika Cancio.

Nia dehan, see hakarak bele, maibe osan minarai nian nee hamutuk 7 bilioens nee, karik metade ba hotu edukasaun, entaun bele dehan problema edukasaun bele rezolve hotu iha tempu badak.

“Se osan sira nee ba hotu edu­ka­saun, entaun saude la lao, infra­estru­tura la lao ona, agora ida nee labele, tenki pasiensia. Ita lao tuir kapa­sidade finansial no kapasidade rekursu hu­manu nebee iha,” komenta tan Nia.

Amandio Soares nudar Direitor Eskola Primaria Publiku Bidau, hanoin, programa merenda eskolar nee diak, tanba bainhira labarik sira nebee la konsege han iha uma, sira bele ba han iha eskola. Maibe hahan nee maka ladun iha nutrisaun, tanba modo nee koto tanan deit.

“Programa nee diak ona, maibe ami husu ba ME atu hasae tan kualidade hahan nebee maka fo ba labarik sira. Troka tiha koto nee ho modo tahan sira nebee fresku. See la troka, entaun hahan nee tenki fo selang-seling, atu nunee labarik sira labele inzua,” hatete Amandio.

  
Lia fuan hanesan hatoo husi Profesora Maria da Silva, husi Eskola Primaria Publiku Bidau, katak, koalia kona ba nutrisaun, entaun bele dehan hahan nebee governu fo liu husi Programa Merenda Eskolar nee laduun iha kualidade, tanba modo nebee maka lor-loron labarik sira konsumu maka koto deit. jin