GOVERNU PRESTA OMENAJEN BA SAUDOZO BESI TAUR RUBI

TIMOR EXPOSE – 26 abril 2011

Díli - Komando Polisia Nasionál Timór-Leste (PNTL) Liu husi komandante jeral PNTL Longinhos Monteiru hato’o kondolensia ba Saudozo inspector chefe Julio da Costa alias Besi Taur Rubi nebe’e fila hikas ba aman Maromak nia kadunan iha domingu (24/04).

Besi Tau Rubi lakonsegue hetan tratamentu medis ba nia saude wainhira hetan atakasaun iha oras tuku 2 dadersan no  iha nia hela fatin Becora no deskonfia moras kurasaun.

“ita hato’o kondolensia ba matebian no familia matebian katak ami lakon tan ona membru ida, ami lakon ami nia ofisial ida ne’ebé hatudu ninia komportanmentu ninia disiplina ba membru polisia Timor Leste liu liu komando polisia distritu Dili,”dehan Longinhos iha Kuartel PNTL Kaikoli Dili tersa ne’e (26/04).

Longinhos hatutan “ nia bele lakon maibe ninia dedikasaun serbi sei sai hanesan modelu ba PNTL no exemplar diak ba PNTL tomak”.

Entretanto Ministru Defeza no Seguransa Kayrala Xanana Gusmão hateten “ohin ita hotu iha ne’e atu presta omenajen ba asuwain ida ne’ebé luta maka’as mos iha tempu rezistensia, ita ohin iha ne’e atu hakruk ba nia.”

Iha fatin hanesan oan husi saudozo Francisco Pinheiro da Costa husu ba Governu atu tau matan ba oan kiak no faluk husi saudozu nian.

Relasiona ho ne’e Ministru Defeza no Seguransa promete atu fó rekoiñesementu ba familia saudozu  nian.

Saudozo Julio da Costa Alias Besi Tau Rubi moris iha loron 09/09/1952 iha suco Haeconi sub distrito Baguia distrito Baucau, matebian husik hela kaben Lizia Fatima Pinheiro ho oan hamutuk nain 14, moris nain sanulu no mate nain 4.

Seremonia funeral ba Saudozo Julio Besi Tau Rubi halao tuir militar nian, hafoin missa remata   continua lori ba Quartel Geral PNTL hodi hetan promosaun husi agenty principal ba Inspektur Chefe, no hakoi iha jardin Heroi da Patria Metinaru nudar rekoiñesementu estadu ba matebian nia contribuisaun ba registensia no ukun rasik an. (Celes)