JOSEFA PARADA – SUARA TIMOR LOROSAE – 10 maio 2011
DILI – Militantes Partidu Demokratiku (PD), hamutuk ema 36 afilia ba Partidu Fretilin, tamba sira sente durante nee PD laduun interese ka abandona hela sira. Afiliasaun nee akontese bainhira Fretilin halo konsolidasaun iha Aldeia Fatumeta, Suku Bairro Pite, Sub Distritu Dom Aleixo, Distritu Dili.
Prezidente Fretilin, Francisco Guterres Lu-Olo, hateten, Fretilin sente haksolok tamba ema sira nee tama fila fali ba Fretilin. Nia haktuir, uluk ema sira nee Fretilin, maibe sira rona fali ema seluk-seluk bosok iha tempu nebee susar no mos iha tempu krizi nia laran, hodi halai tuir fali partidu seluk.
“Halo promesa oi-oin, maibe too fim laiha rezultadu ida. Ema sira nee hotu akompanha, laos ema la hatene buat ida. Ema boot ona no ema hatene haree i hatene sukat mos ho nia kakutak katak, haree buat sira nee hotu, nebee maka sira koalia laiha realidade, tamba nee duni ema hakarak fila fali.
Fretilin ninia politika hakarak fo mahun ba povu tomak. Portantu kulaker ema ida nebee maka desde ho livre vontade tama fali mai Fretilin , ami simu ho liman rua,” dehan Lu-Olo ba STL iha Osindo, Surik Mas, Dili, hafoin remata loke abertura seremonia konsilidasaun, Sabado (7/5).
Kona ba programa konsolidasaun nee, Lu-Olo, esplika, ida nee hanesan aktividade Fretilin ninian nebee halo nanis ona iha tinan kotuk liu ba. Liu husi konsolidasaun nee, atu bele hatoo mos orientasoens no haklaken ba militantes hot-hotu atu apar no hatene aktividade Fretilin ninian.
Entretantu Sekretariu Jeral Partidu Demokratiku (PD), Mariano Assanami Sabino, hateten, em principio wainhira partidu ida kaer ukun, nia implementa politika partidu nian hodi servi povu tomak, laos servi nia militantes deit. Needuni, labele labele lakon vizaun estadu nian, maske iha partidu ida nia laran.
“Nudar Partidu Demokratiku ema hot-hotu iha liberdade atu tama partidu nebee deit, Partidu Demokratiku la bele kesi ema, maibe bainhira ema tama partidu, nia maka tenki iha konsiensia duni katak partidu nee semata-mata laos atu servi fali ba nia deit, mais partidu iha para servi nasaun no povu tomak,” tenik Mariano Assanami.
Ba STL Deputadu Rui Menezes husi Bankada PD, wainhira responde perguntas konaba lider parpol PD nian nebee haksoit tama ba partidu CNRT nian, hateten, ida nee normal, kuandu 1 ka 2 sai ba partidu seluk, tamba nee konsekuensia husi ambiente demokratiku. Tuir Rui, ida nee importante boota ba dezenvolviementu demokrasia iha paiz ida nee. Tamba nee, desde uluk kedas PD nunka tau marka ba ninia militantes.
“Ami so uniku partidu nebee hamriik iha rai ida nee hodi la fahe kartaun eleitoral ba militantes sira. Partidu hot-hotu fahe nia kartaun ba nia militantes sira, entaun sira hakfodak wainhira militantes lori kartaun nee halai fali ba partidu seluk. Radikalmente ita la bele dehan ema sira nee traidor ka oportunista, nee la bele,” komenta Rui.
Iha ambiente demokratiku, katak Rui, loloos labele fahe kartaun partidu nian ba militantes sira hodi fahe fali povu iha nivel suku, aldeia iha distritu depois kesi metin sira hodi la bele iha liberdade ba iha partidu seluk. Tamba nee, PD kongratula sira nebee ba iha partidu seluk. PD fiar katak sira sei halo diak ba ita nia rain, dezenvolve demokrasia no mos iha partisipasaun aktivu liu tan dezenvolve futuru rai nee ba progresu dezenvolvementu povu nian.
“Iha ambiente demokratiku, hot-hotu tenki livre iha liberdade nia laran, atu bele disidi no eskolha partidu nebee sira atu tama hodi espresa sira nia hanoin no dereitu nebee sai mos hanesan dereitu umanus nebee ita koalia katak dereitu simpel politika,” dehan Rui.
Ba asuntu hanesan, Deputadu Fretilin, Joaquim dos Santos, hanoin, see membru husi partidu balun hakarak tama partidu seluk nee afavor nia dereitu, tamba sidadaun iha liberdade atu eskolha no iha liberdade atu halo opsaun politika.
Joaquim hatutan, see nia hakarak sai husi partidu ida ba fali partidu seluk, nee nia dereitu no ema seluk labele inpende. “Maibe kuandu menyesal fila fali mai ita julga tamba Fretilin nia politika maka ida nee. Mesmu nia lider, sekali nia viola prinsipiu Fretilin, nia fila fali mai tenki hahuu husi zero ba halo inskrisaun iha aldeia auto kritika (pengakuan) hahuu prosesu foun hodi bele manan konfiansa povu,” nia esplika.
Opsaun politika, katak Joaquim, iha liberdade iha sidadaun hotu, laiha ema ida bandu mais iha regras iha partidu Fretilin nian maka nee, kuandu sai husi Fretilin no hakarak fila fali mai tenki hahuu husi zero ba halo auto kritika iha aldeia hodi bele manan konfiansa povu fila fali no sai fali militantes Fretilin nian.
Tuir Marcos da Conceição nebee afilia ba Fretilin, hatete, durante nee sira fo apoiu ba PD hodi hetan kadera iha Parlamentu Nasional no mos Governu, maibe PD nunka fo prioridade diak ba sira, nunka loke matan ba sira no halo sira mos too ohin loron sai hanesan nee deit.
“ PD nunka fo prioridade, nunka loke matan no halo netik buat ruma mai ami. Ho ida nee maka ami hakarak fila fali ba Partidu Fretilin hodi tama fali ba ami nia uma fukun nebee maka ami terus ba,” komenta Marcos. Jay
Sem comentários:
Enviar um comentário