LAHIA LIDERANSA PD RUMA HAKSOIT BA CNRT

JOSEFA PARADA – SUARA TIMOR LOROSAE – 10 maio 2011

DILI - Partido Democratico rejeita totalmente katak laiha lideransa Partidu haksoit ba partidu CNRT, ema sira nebee STL, temi hanesan Bendito Freitas, Julio Tomas Pinto, Valentin Varela, Ivo Valente no Francisco da Costa Guterres, nunka halo parte estrutura PD nian sa tan lideransa.

Tuir nota komunikadu nebee STL simu via email dehan katak, nem sira ne’e hotu ne’ebé STL temi ne’e militante PD nian. Balu mai buka kose-kose PD hodi hateten an PD, maibe la hetan kadeira ne’ebé sira buka, sira tenki ba buka fali kadeira iha partidu seluk. Balu uluk militante PD duni, maibe agora sira nega katak la’os PD maka aprezenta sira nia naran hodi halo parte membru Governu, maibe karik sira ba haree didiak lista ne’ebé PD entrega ba PM Xanana Gusmão, sira nia naran iha laran hotu.

Tuir nota nee mos dehan demokrasia maka hanesan ne’eduni, PD respeita ema nia opsaun politika, maski maioria povu Timor-Leste seidauk simu atitude politika sira hanesan ne’e tamba konsidera oportunista no la iha moral. PD sei ho laran ksolok tebes fasilita sira ne’ebé prinsipiu la metin hodi sai hosi PD, tamba PD hakarak dezenvolve Timor-Leste ho ema sira iha prinsipiu politika, etika ho moral metin.

PD la’os fatin hodi buka kadeiras ho poder. Se maka hakarak buka poder ba an rasik, bele ba buka iha partidu seluk. Nune’e PD hakarak hato’o de’it adeus no dezeju susesu barak ba sira. PD mós hakarak hato’o bem vindu ba sira ne’ebé mai hamutuk ho PD, sira ne’ebé mai ho prinsipiu politika metin, mai ho ideias hodi kontribui ba hametin demokrasia, paz no estabilidade hodi lori povu Timor-Leste ba iha moris di’ak ho hakmatek.

 
PD mós hakarak hato’o parabens ba Partido CNRT ne’ebé konsege realiza ninia Kongresu ba daruak ho susesu iha loron haat ikus ne’e nia laran. */lio