REDE FETO KONTINUA DEFENDE FETO IHA DIREITU HOTU-HOTU

CJITL – 11 maio 2011

CJITL Flash, Rede Feto Timor Leste hanesan organizasaun salurik ba organizasaun 24 iha Timor Leste – TL hala'o programa Advokasia ba direitu feto no igualdade jeneru inklui mos advokasia ba lei ne’ebe diskriminativu ba feto sira kontinua defende makas direitu feto nian.

Tuir komunikadu ne'ebe CJITL online simu, oras ne'e dadaun Rede Feto hamutuk ho Groupu Trabalhu Advokasia REDE FETO halao advokasia maka’as ba artigu ne’ebe sei diskrimina partisipasaun feto iha vida politika iha Lei Eleisaun Jeral Parlamentar numeru 06/20006.

Artigu ida maka groupu ne’e preukupa maka artigu 12 alinea 3 ne’ebe tuir grupu ne'e ladun fo oportunidade ba feto atu bele involve iha politika nomos ladun iha balansu jeneru.

Tuir komunikadu katak maske iha ona persentase feto ne’ebe diak ona (21 kadeiras) iha Parlamentu Nasional maibe tuir Rekomendasaun Komite CEDAW 2009 sei iha diskriminasaun iha lei numeru 6/2006 rasik no sira husu Estadu Timor-Leste bele halao revisaun ba lei ida ne’e, Tanba ne’e Rede Feto hatoo sira proposta ba Bankada, Komisaun nomos Groupu Mulheres (GMPTL) Parlamentu Nacional no ejiji Parlamentu bele konsidera prinsipiu igualdade de jeneru iha lista kandidatura ba Eleisaun Jeral 2012.

Rede Feto mos hakat ba hasoru organizasaun feto partidu sira atu bele halao diskusaun klean liutan konaba preukupasaun feto politika hetan durante involve iha partidu.

iha loron Tersa 3 fulan Maio 2011, liu husi debate naruk iha sesaun plenaria Parlamentu Nacional, artigu numeru 12 hetan revisaun husi maioria membru Parlamentu Nacional ne'ebe sai hanesan suseso ida ba servisu advokasia Rede Feto ho nia aleadu sira.

Tuir artigu ida ne'e hateten katak, "Lista husi kandidatus efektivus no mos alternatives tenke inklui pelu menus feto ida iha kada grupu husi kandidatu nain tolu". (*/CJITL)