Suara Timor Lorosae
DILI - Kandidatu Prezidente Republika Francisco Guteres Lu-Olo, hakfodak wainhira vizita eskola Centru Ensinu Baziku Fatumeta. KOndisaun eskola publiku nee daudauk aat tebes, kalen kuaze fruzu hotu ona, nunee mos plafon eskola lahuk no balu tabele daudauk, kondisaun eskola nee afeta tebes ba prosesu aprendizajen iha eskola nee.
Kandidatu Prezidente nee hatete hanesan Prezidente Fretilin, lakohi lori biban vizita nee hodi hateten liafuan balu konaba kondisaun eskola. Maibe wainhira governu ida hodi troka ukun Fretilin nian ho mehi atu hadia povu nia moris inklui kondisaun eskola, maibe realidade hatudu oin seluk, governu ida nee ukun ho osan barak, ministeriu sira goza ho milaun-milaun deit, maibe dezenvolmentu zero boot. Tan nee lori nafatin liafuan hanesan opozisaun iha Parlamentu Nacional hato'o ba ukun nain sira atu hadia povu ida ne'e nia moris, li-liu area edukasaun, saude no area importante sira seluk iha rai laran.
Kandidatu nee hatutan, dalabarak akompanha debate orsamentu iha Parlamentu Nasional, rona deit osan tokon ba tokon, Ministeriu Edukasaun hatoo nia proposta orsamentu boot teb-tebes. Maibe tinan ba tinan kondisaaun eskola mak aat ba bei-beik, kadeira falta, meja falta, labarik sira balu sei tur iha rai hodi tuir prosesu aprendizajen.
“Uma eskola ne'e kalen kuak hotu ona, wainhira udan, estudantes sira labele tuir prosesu aprendizajen. Hau hanoin Fretilin iha Parlamentu Nasional sempre levanta kestaun sira nee, maibe governu ida ne'e latau matan, osan barak mohu, mas ita lahatene ba iha nebe," Kandidatu Prezidente Republika Francisco Guterres Lu-Olo liu husi nia Diskursu iha Ensino bazeku Central Fatumeta Sabadu (25/2).
Eis Prezidente Parlamentu Nacional preokupa tebes ho kondisaun eskola ho futuru labarik nebe tuir prosesu aprensizajen iha eskola nee. "Ita dehan jovem sira mak futuru nasaun nee nian, maibe kondisaun saida mak ita kria ba sira para aban bainrua sira pronto troka ita, se bainhira ita nia oan sira buka matenek ho kondisaun eskola aat hela hanesan ne'e. Governu ida ne'e hakarak lori buat hotu halo politika deit, maibe realidade sai oin seluk liu. Ita haree ba inan-aman sira nia preokupasaun loron ba kalan, oinsa sira nia oan eskola para aban bainrua bele sai diak, maibe nafatin hela deit," komenta Lu Olo.
Lu-Olo hatutan, governu nee ladun tau matan ba eskola publiku, tanba sira nia oan la eskola iha eskola publiku, sira ema nebe iha kbiit bele ba eskola iha fatin diak, tanba hetan uma diak, hetan mos kareta diak ba nia oan sira. Maibe kasian ba povu maubere nia oan sira husik hela iha uma aat, no eskola iha kondisaun uma la diak. "Hau koalia hanesan Prezidente Partidu, hau koalia mos hanesan eis titular Prezidente Parlamentu Nasional," Lu-Olo salenta.
Kondisaun eskola tenki hadia, tanba presiza halo mudansa ba situasaun, nune'e bele hetan eskola ne'ebe diak, no labarik sira iha kondisaun sai matenek liu inan aman sira. "Hau la hatene, se eskola iha Dili laran mak hanesan ne'e, satan eskola iha foho ou Distritu sira seluk, ne'e pior," tenik Lu Olo.
Prezidente Fretilin nee konsidera Ministeriu Edukasaun laiha planu integradu, nunee la hatene nebe saida prioridade, nebe mak halo presiza halo levantamentu atu hadia, tanba governu nee nia mehi mak hakarak koko mak haree hodi gasta osan bar-barak, mas folin laek. "Hau vizita eskola sira seluk aat hanesan fahi bibi luhan," komenta.
Iha fatin henesan Xefi Aldeia Rai Nain Carlos M. Riberio, lori inan aman no estudante sira nia naran hatete, kondisaun eskola ne'e daudauk aat no nunka hetan atensaun husi governu Xanana, maske dalabarak halo proposta ba governu. Iha 2009 governu AMP vizita eskola nee hodi promete atu hadia eskola nee iha 2010, maibe realidade laiha, promote sira nee hanesan promesa falsu, tan nee kondisaun eskola nafatin aat, kalen no plafon sira dodok arbiru, kadeira meja lato, labarik sira mai eskola balu tur deit iha rai, tanba total estudande 1.850, kadeira meja 200 deit.
Iha biban nee Adjuntu Direitor eskola Ensino basiku central Fatumeta Cesarina Correia Guterres, agradese tebes ho vizita Kandidatu Prezidente republika Francisco Guterres iha eskola nee. "Ami kontenti, tanba kondisaun eskola aat liu, maibe ami iha esperansa tanba bainhira, kandidatu Prezidente republika Lu Olo mak manan, sei lataka matan ba ami nia eskola nee," Cesarina salenta.
Tuir Cesarina hatete, nasaun ida atu lao ba oin, xavi importante mak Edukasaun, tan nee kondisaun eskola importante, no hato'o bebeik proposta ba governu liu-liu ba Ministeriu Edukasaun. Maibe to'o oras nee laiha realidade. gus
Destaque Página Global
Leia mais sobre Timor-Leste - use os símbolos da barra lateral para se ligar aos países lusófonos pretendidos.
ELEITORES TIMORENSES: PARTICIPEM NA SONDAGEM “VOTO PARA PR DE TIMOR-LESTE”, na barra lateral
Sem comentários:
Enviar um comentário