“FRETILIN, CNRT PRONTO CONTRA VIOLENSIA”

EUGÉNIO PEREIRA – JORNAL INDEPENDENTE

Díli - “Sekretariu Jerál Partidu FRETILIN, Dr. Marí Alkatiri, deklara katak partidu istóriku FRETILIN no Partidu Consellu Nasionál Rekonstrusaun Timor (CNRT) pronto hamutuk atu rejeita totalmente violensia no krimi, garante estabilidade no seguransa iha eleisaun2012.

Marí Alkatiri, informa kestaun ne’e hafoin hamutuk ho PM Xanana Gusmão ba hasoru Prezidente da Repúblika horseik hodi koalia kona ba asuntu rai laran, liliu situasaun ba eleisaun jeral nian.

“Ami halo enkontru regular ho Prezidente Ramos Horta hodi konsulta kona ba situasaun jeral TL i ami hotu-hotu hato’o preokupasaun ida ne’ebé bele dehan hotu-hotu tenke kontribui para eleisaun jeral 2012 tenke sai eleisaun ne’ebe diak, para ita hapara ona kultura violensia, tenke para ona, tenki sai fali kultura de paz,”dehan Alkatiri ba Jornalista iha Palacio Prezidente Aitarak-Laran Dili, horsehik.

Alkatiri salient liu tan katak iha eleisaun jeral tinan uluk mak mosu violensia sunu uma no krimi oioin mosu, maibe ba nia dehan ba eleisaun 2012, sira garante sei la’o ambiente paz no dame iha distritu no suku tomak.

Nune’e mos Primeiru Ministru no atúal Prezidente CNRT, Kay Rala Xanana Gusmão hatete katak, sira nia parte sei hato’o mos ba joventude CNRT no Joventude FRETILIN sei la halo violensia iha 2012, katak, ba membru sira ne’ebe involve iha violensia durante eleisaun, sei hasoru PNTL no hetan kastigu tuir lei.

“Ami iha komitmentu boot ba situasaun hotu sei la bele mosu konflitu tan,”dehan Xanana.

Asuntu seluk ne’ebé importante mos ba kona ba oinsa lider politiku sira hamutuk ho igreja atu prepara lider jerasaun foun aban bainrua nian, nu’udar follow up ba enkontru ne’ebe tinan kotuk hala’o ona iha sub-distritu Maubesi konaba preparasaun lider jerasaun foun sira.

“Enkontru iha Maubise un (I) iha tiha, agora ami sei bolu Dom Basílio ne’ebe ami intrega kna’ar ida ne’e, ne’e mak ohin ami hahu prepara na hodi ko’aloa ba malu dehan saida mak atu ko’alia ho Amu Bispu hodi prepara fatin no sa loron mak Maubesi doiz (II) sei realize,”dehan PM Xanana.

Alkatiri Aumenta liu tan hodi informa katak enkontru ne’e koalia mos konaba decade iha tinan 2020 katak, Timor Leste tenki hetan mudansa maka’as iha dezenvolvimentu no Paz.

Bispo Dom Basilio rasik, antes ne’e informa katak, Igreja sei prepara kondisaun tomak hodi forma jerasaun foun sira, ne’ebe presija tempo naruk atu halo debate diak liutan.

Iha parte seluk, Prezidente Repúblika, José Ramos Horta informa katak inkontru ne’ebe nia halo ho lider partido rua ne’e, debate konaba politika estadu atu forma jerasaun foun Timor Leste i ko’alia mos konaba politika FRETILIN no CNRT nu’udar Partidu bo’ot atu hamutuk rejeita Violensia iha tinan 2012 mai.

“Ami husu ona ba partidu FRETILIN, CNRT no partidu sira hotu-hotu atu hametin liu tan dame iha eleisaun 2012, dame tenki metin,”dehan Prezidente Ramos Horta.

“Ami sei ko’alia nafatin fo apoia ba jerasaun politika foun hodi hala’o kolaborasaun diak husi maun boot Xanana Gusmão, Dr. Marí Alkatiri no lider Partidu seluk tan,”hattutan Horta.