ESKUADRA PNTL QUELICAI SIMU KASU VIOLENSIA

JOSEFA PARADA – SUARA TIMOR LOROSAE – 04 maio 2011

QUELICAI – Policia Nasional Timor Leste (PNTL), Eskuadra Quelicai, hahu Janeiru to Abril tinan ne’e, resjistu ona kazu violensia domestika hamotuk tolu, kazu rua tama ona iha prokurador no ida seluk sei iha prosesu Investigasaun.

“Hahu husi fulan janeiru too ohin loron,  ami rejista kazu violensia domestika iha eskuadra Quelicai nee hamutuk tolu,  rua iha ona prokuradora no ida sei iha prosesu investigasaun,” Komandante Interino Esquadra Quelicai,  Sargento Feliciano Carlos Filipi, kasu lia hirak nee ba STL iha nia servisu fatin Kinta, (29/4).

Violensia domestika hirak nee mosu,  katak Carlos tanba la komprende malu, nunee wainhira  liafuan naksalak komesa hamosu ona problema. Maske problema kiik oan ida.

Nia esplika  kaju violensia  hirak ne’e  mosu iha iha loron 29 Janeiru no loron 2  Marsu liu ba,  husi kazu hirak nee kazu rua tama ona iha prokuradoria,  ida sei iha prosesu  investigasaun, enkuantu vitima sira oras nee hamahon aan iha  uma mahon.

Iha fatin seluk,  Antonio Soares (komonidade) hatete, violensia domestika mosu tanba impaktu husi ekonomia uma laran, balu baku feen ka laen tanba laiha posbilidade hetan osan. “Hau hanoin violensia domestika sira ne’e mosu ita bele dehan impaktu husi ekonomia uma laran, tanba faan produtu lokal ema lan sosa  hanesan tempu uluk, no mos folin sasan masak karun,” dehan Antonio.

Nia husu ba komu nidadetomak atu kompriende no roma malu, wainhira iha problema ruma tenta uza meius seluk rezolve internal uma laran no la presiza lori problema nee to liur enkuantu ladun grave.

Nune mos Teresa Belo hatete, violensia domestika mosu depende ba ema ida-idak nebe halao nia vida moris, tanba koalia kona ba umanu feto ho mane ema ida deit nebe tenke    kompletu malu, laos buka hafahe malu.  “ Dala barak mos feto halo violensia ba nia kaben, maibe mane nia hanoin nia  dignidade kuandu feto halo violensia domestika ba nia,” dehan Teresa.

 Martinho Moreira hatete, atu implementa lei violensia domestika  iha suku laran depende ba konsiensia populasaun sira nian, katak feen ho laen nebe kesi metin liu husi juramentu iha igreja no adat laos atu baku malu ou domina malu, maibe atu buka ajuda malu hodi harii uma kain  ida dignu.lay