Estrada Kuak, Povu Kritika, Caeiro: “Ema Ida ka Rua, La Tama Kategoria Povu”

JOSEFA PARADA – SUARA TIMOR LOROSAE – 10 maio 2011

DILI -  Fenomena estrada kuak iha Kapital Dili, halo povu balun kritika governu. Tamba governu liu husi Ministeriu Infraestrutura la duun rezolve problema ida nee. Hadia estrada, la too fulan, komesa aat fali ona.

Jose Maia, nudar habitante Kapital Dili, lamenta ho estrada nebee rehab husi kompania sira iha Dili laran. Tuir Jose nia haree,  kompania sira nee, la duun hetan kontrolu maximu husi governu. Kompania sira halo konforme sira nia hakarak, nunee rezultadu nebee sira fornese kuaze mairia laiha.

“Kompania sira kaer projeitu hanesan hadia estrada ate agora, ita haree laos deit estrada, pior iha  distritu  kondisaun estrada aat liu,” dehan Jose.

Jose haktuir, nudar povu kiik nebee loron-loron uza transporte  publiku, haree estrada sira iha rai laran kuaze laiha ona kondisaun. Estrada nebee kuak, komesa boot ba bebeik,  nunka hadia. “Se taka karik, ohin taka, aban komesa nakloke,” nia lamenta.

Preokupasaun hanesan hatoo mos husi Mateus  Sarmento. Nia dehan, estrada  area Matadouro nian, oras nee daudaun  kondisaun la diak. Needuni, governu presiza aloka osan hodi hadia estrada iha bairo-bairo inklui Matadouro.

“Estrada Matadouro nian kuaze kuak boot tebes, ita lahatene iha ona alokasaun orsamentu hodi hadia estrada hirak nee ka lae. Bainhira mak komesa hadia ona estrada sira nee,” Mateus kestiona.

Nunee mos Joaquim Vaz (Komunidade Bebora), hatete,  projetu hadia estrada iha Dili laran kuaze laiha kualidade, tanba  atividade kompania sira nian,  la hetan kontrola husi governu. “Estrada sira nee laiha mudansa buat ida, tinan-tinan estrada mak nunee hela. Orsamentu estadu nian durante governu AMP nee boot, mas rezultadu sei hanesan hela ho governu anterior uluk nebee ukun ho orsamentu milaun74 deit,” Vaz kompara.

Entretantu Patricio da Costa (estudantes), hatoo kritika makaas hodi konsidera governu AMP nebee lidera husi PM Xanana Gusmão,  laiha vizaun politika ba dezenvolvementu. Tamba nee tinan haat ona, governu AMP ukun, maibe seidauk halo buat ida.

 “Se sira iha vizaun, Xanana bele halo milagre, tanba osan barak. Mas Xanana laos ema nebee iha vizaun dezenvolvimentu, nunee mak tinan haat governasaun nee, gasta osan osan mak barak, maibe rezultadu laiha,” nia hatete.

Hatan ba kritika hirak nee, Sekretariu Estadu Obras Publika, Domingos Caeiro, hatete, ema nain  ida ka rua mak koalia, la tama ketegoria povu.

“Ema ida rua la ketegoria povu. Ba povu, hau hanoin dalaruma informasaun sira nee ita tenki fahe halo didiak, tamba saida? Hau foti tiha ona problema nee fulan ida ka fulan rua, haruka para atu sira muda buat sira nee,” dehan Domingos ba STL, Segunda (9/5) iha Salaun STAE.

Nia hatutan, kualker governu, povu tenki fo konfiansa atu governu ezekuta programa nebee prepara hela ona. Hanesan instituisaun, governu iha reponsabilidade moral tomak atu responde kualker problema nebee mosu.

“Ita seidauk sufisiente atu halo peskiza ba buat sira nee. Ita presiza halo levantamentu ida nebee diak. Alkatraun nebee sira uza, tuir lolos alkatraun nebee kualidade la diak ona. Tamba nee, ami haruka sira para, no sei sei sobu,” dehan Caeiro. Lay