quarta-feira, 25 de maio de 2011

FULAN 5 ONA, “ESTUDANTE CUBANO” LA SIMU SBSIDIU




JOSEFA PARADA – SUARA TIMOR LOROSAE

DILI–Bankada Fretilin iha Parlamentu Nasional kestiona seriedade husi politika governu nian, kona ba dezenvolvimentu rekursus humanus iha seitor saude. Kestaun ida nee mosu, relasiona ho subsidiu nebee governu seidauk foo ba estudante medisina Timor-oan nebee halao estajiu iha teritoriu Timor-Leste tomak, hafoin remata formasaun teoritika iha Cuba.

Husi Bankada Fretilin, Deputadu Francisco Miranda Branco, haktuir, fulan lima (5) ona, estudante estajiariu sira nee, seidauk simu subsidiu. Governu promete subsidiu ba sira ho valor U$ 75 kada fulan, maibe too agora sira seidauk hetan nafatin. Situasaun ida nee bele lori konsekuensia ba sira nia prosesu estajiu nian. Needuni, nia husu ba governu, liu-liu Ministeriu Saude atu rezolve problema nee ho seriedade.

“Seitor saude nee seitor ida prioridade tebes ba dezenvolvimentu nasaun nee nian, no governu la duun foo importansia,” dehan Branco ba STL iha Parlamentu Nasional, Tersa (24/5).

Governu lamenta teb-tebes ho esteitmentu governu nian, nebee dalabarak konsidera asuntu saude nudar seitor importante ba nasaun nee, maibe iha pratika nunka implementa. Governu sempre dehan, wainhira saude forte nasaun mos forte, maibe iha pratika oras nee dadaun, estajiariu medisina sira hasoru difukuldade tamba prosesu atu selu subsidiu demora liu no lori tempu fulan lima ona.

“Estajiarus sira presiza osan atu bele sustenta sira nia akomodasaun, sira nia alimentasaun, transporte no sira nia asesu ba internet. Tamba atu kompleta sira nia estajiu, sira presiza osan, entaun reseu ba ita hotu maka karik ida nee akontese maka iha implikasaun ba sira nia perturba katak la hetan kondisaun diak atu halao sira nia prosesu estajiu,” tenik Branco.

Liafuan hanesan reforsa husi Deputadu PD, Adriano do Nascimento, katak, kestaun ida nee fila fali ba governu. Tuir akordu Ministriu Saude (MS) nee oinsa, tamba see iha akordu ida foo subsidiu ba estudante sira hodi halo estajiu, entaun governu nee tenki foo. Maibe see la foo, nee sakrifika no desmoraliza fali estudante Cubano sira nee. Ida nee la duun diak.

“Agora, governu Cuba foo ona bolsu estudu para halo estuda iha tinan barak iha Cuba no fila mai Timor atu pratika maka governu la foo, nee preokupasaun boot ida. Ministeriu Saude la bele desmoraliza labarik sira no la bele tau fali estudante sira nee iha kondisaun frustadu maibe sira tenki estuda didiak,” komenta Adriano.

Entretantu tuir Deputadu Mario Viegas Carrascalão husi Bankada PSD, katak, nee problema finansas ho Ministeriu Saude nian. Tamba TL nia sistema ho mekanismu sira nee maka la duun komprende, maibe see mekanismu sira nee iha TL komprende ho di-diak, katak iha loron hanesan nee tenki selu, hodi nunee sira bele uza para sosa hahan no buat seluk nebee relasiona ho estajiu nian.

“Sala laos sira nian, maibe sala nee iha nee, tamba la haruka osan ba sira. Ida nee problema ita nian, problema responsabilidade no problema ita la hanoin konaba ema seluk. Haree deit maka ita nia aan, ida nee egoismu no irresponsabilidade, tamba nee kestaun sensibilidade,” dehan Mario.

Iha fatin henesan, Vice Prezidenti Komisaun F asuntu Saude Edukasaun no Kultura, Farancisco Jeronimo, rekoinese, loos duni durante nee, estudante sira simu deit osan hanesan bolsu estudu nebee mak uluk sira simu iha Cuba, nee mak sira kontinua simu nafatin no sira simu nafatin bolsu estudu deit, maibe la simu osan ida. Bolsu estudu nee mos laos simu fulan-fulan, maibe fulan tolu mak foin simu dala ida.

“Hau husu ba estudante sira atu pasiensia tanba iha orsamentu nebee ami diskuti iha 2010 ho 2011 nee, komisaun husu ba governu atu bele halao saida mak programa tiha ona iha 2010 too 2011, atu labele haluha. Tanba ba sira nee orsamentu tiha ona, needuni tenki halao. Ita presiza kria fatin diak para sira bele halao sira nia pratika no estadu tenki suporta sira para sira bele halao sira nia pratika diak liu, hodi nunee ita hetan doutor sira nebee professional iha future. Labele halo fali hanesan kelinci percobaan,” Jeronimo sujere. jay

Sem comentários:

Mais lidas da semana