LUCIA LOBATO PRONTU KANDIDATU AAN BA ELEISAUN PREZIDENSIAL

JOSEFA PARADA – SUARA TIMOR LOROSAE – 03 maio 2011

DILI - Ministra Justisa Lucia Brandao Lobato, hatoo ona ninia kandidatura nudar partisipante iha eleisaun   prezidensial 2012.

“Hau prontu atu lidera povu ida nee, karik ita nia povu sira tau duni sira nia fiar mai hau atu kaer no ukun Nasaun ida nee, tanba iha tinan hirak liu ba hau rasik prontu tiha ona, maibe la liu iha eleisaun agora, hau koko fali tok “ hatete Lucia  ba STL iha merkadu lama wainhira Partisipa iha Congresu CNRT nian Sabado (30/4).

MJ Lucia hatama ona CV hodi sai partipante ida iha  eleisaun 2012, maske iha tinan hirak nia laran nia sai hanesan Minstra Justisa, iha esperensia barak ona,  oinsa atu lidera povu, maibe buat hotu laos hili aan atu tur iha neba,  povu maka sei hili, tanba nee soberania povu nian.

Nune mos Vice PM Jose Luis Guterres hatete too oras nee nia   seidauk deklara aan  publiku atu kandidatu aan ba iha eleisaun prezidensial.  “Maibe karik povu hili hau no tau fiar mai hau, entaun hau mos prontu atu ukun povu iha nasaun ida nee, maibe hau rasik seidauk deklara ba publiku toma katak hau maka atu sai Prezidente iha eleisaun 2012,” nia hatete.

Nunee Direitur Ezekutivu Lalenok Ba Ema Hotu (LABEH ) Christopher Henry Samson hatete,  sese deit bele  kandidata aan ba iha eleisaun prezidensial  2012, mas atu sai prezidente republkika depende ba povu rai nee liu husi eleisaun. “Maibe hau hanoin ema sira nebe kandidata sira nia aan ona, nee mesak ema nebe iha kapasidade atu ukun povu iha Nasaun ida nee, maibe buat hotu fila fali ba ita povu, sira mak hili atu  ukun povu nee ho diak, pasti nia maka sei sai hanesan lideransa iha eleisaun 2012,” tenik Henry.

Nunee mos Estudante UNTL fakuldade Direitu Arcanjo da Costa hatete, atu hili ulun rai nee tenke haree no tetu didiak inklui haree figura lideransa  lideransa sra nian. Prezidente nudar figura nebe atu ganate unidade nasional, no funsionamentu orgaun demokratika, tenke fihir figura nebe matenek mas hadomi  povu.

“Hau  hakarak Governu ida nee maka bele  nafatin, tanba nia la hare ba ema boot no ema kiak, ema hotu hanesan  deit, hau hakarak Jose Ramos Horta maka kontinua nafatin hanesan PR, tanba iha esperensia boot i mundu tomak kuinese. mj5