CHRISTOPHER SAI SUSPEITU FALSIFICASAUN DOKUMENTUS

JOSEFA PARADA SUARA TIMOR LOROSAE – 03 maio 2011

DILI — Direitur Ezekutivu  Lalelok ba Ema Hotu (LABEH), Christopher Henry Samson, sai suspeitu ba kazu falsifikasaun dokumentus.

Christopher simu ona notifikasaun  Tribunal Distrital  Dili  hodi aprezenta a’an hanesan suspeitu iha  Kuarta 4   Maiu  2011, horas  9.00 dader hodi responde  akuzasaun  PJR, Ana Pessoa Pinto ho númeru prosesu  205/PDD/2006.

“Hau nia krime mak hakilar makaas  korupsaun no injustisa iha Governu Fretilin no Governu AMP no foin lalais ne’e LABEH husu Parlamentu Nasional atu hasai imunidade  Ana Pessoa hodi ba hatan iha Tribunal,” hatete Christopher  liu husi komunikadiu imprensa nebe STL asesu,  Segunda (2/5).

 
Christopher konsidera aku­za­saun ida ne’e baratu, falsu, lai­ha baze legal no fundamentu. Aku­zasaun PGR Ana Pessoa nian hanesan kantiga (lagu lama)  ne’ebé laiha valor, tanba Mana Ana Pessoa, sempre uza nia podér  nu’udar Ministra Jus­tisa, no Ministra Estatal iha tempu governasaun Fretilin nian hodi buka oinsa para nega katak nia (Red- Christopher) la’os Timor oan, maibé haluha tiha katak nia so bo’ot iha Estadu, maibé Christopher bo’ot iha uma lisan Tamaop Bobonaro.

Prezidente Republika (PR), Jose Ramos Horta, laran triste tanba to’o ohin seidauk rezolze problema pasaporte, direitor LABEH nee nian. “Hau la hatene tanba saida, maibé iha Nasaun ne’e PR no PM laiha poder ba pasaporte, hau rasik no PM Xanana halo surat ida ba MJ atu fo pasaporte ba Christopher, MJ seiduak desidi, hau nia konkluzaun ida deit, ita bo’ot oin a’at, nia la gosta ita, entaun ida ne’e uniku razaun ho ida ne’e reprezentate Governu nian bele ba koalia ho MJ atu pasa pasaporte ba Christopher,” salenta Horta.

Christopher hateten karik kauza husi  oin a’at duni hanesan PR Horta hatet  no moris metan, tanba metan sira iha mundu tomak sempre hetan diskrimasaun, maibé luta kontra korupsaun no injustisa la presiza ema bonito ka ema oin a’at.

Hahu kedas iha governasaun Fretilin nian PGR, Ana Pessoa nu’udar Ministra  Justisa hakarak duni Direitor Labeh atu sai hosi Timor,  maibé la konsege tanba Fretilin  monu iha tinan  2006, nunee mos depois Ana Pesoa hetan fiar hanesan  Prokurador Geral Republika hakarak Christopher sai husi Timor Leste.

“Hau agredese ba Tribunal Distrital Dili ne’ebé simu kazu ida ne’e no marka ona julgamentu, ba loron  4  Maio  2011,  ne’e  opor­tu­ni­dade diak  ba  hau no  povu Ti­mor laran tomak ne’ebé durante ne’e  dúvidas bo’ot kona-ba  hau  ne’e  ema Timor  oan  ida ka lae, hodi mai iha tribunal atu rona akuzasaun hosi hau nia bin bo’ot Ana Pessoa hasoru hau,” nia informa.

Durante ne’e ema balun dúvidas Christopher  ne’e  ema  ne’ebé, balu sik  intelligent Amerikanu nia, balu dehan  CIA, FBI, terrorista, balu dehan nia iha passaporte 10, balu dehan nia iha naran 20, no akuzasaun sira seluk tan. “Hau hanoin nee  oportunidade diak hodi hatene lia los hau nia inan bin alin sira, tanba nia la brani hasoru hau  nu’udar  oan  bo’ot  iha uma lisan Tamaop Bobonaro,” nia komenta.

Christohper prontu hasoru  malu  iha  tribunal,  tanba tribunal la’os fatin polítika, no tribunal la involve iha jogus polítika foer.

Nia rezeita  totalmente akuzasaun husi PGR Ana Pessoa nian, no konsidera nee hanesan  tuda fatuk subar liman.Akuzasaun ne’e lalos no iha motivu polítika, oinsa agora mak nia foin ba tribunal durante tinan 10, mana Ana Pessoa iha ne’ebé? (Kasian ho polítika murahan) ne’ebé  laiha valor lei nian. Ne’eduni LABEH  nia  deklarasaun katak Parlamentu Nasional tenke hasai imunidade, Ana Maria Pessoa Pinto  nian hodi ba hatan iha Tribunal.

 
“Hau prontu tebes atu ba Tri­bunal hodi buka lia los no justisa, tanba tribunal labele he­tan in­fluensa  polítika husi mana Ana Pessoa, fatin justisa mak Tribunal,” hateten Christopher. */car