PM APROVA ALTERASAUM LEI BA ELEISAUN PARLAMENTU NASIONAL

CJITL

CJITL flash, Parlamentu Nasionál Kuarta feira (04 Maiu) foin lalaia liu ba aprova proposta Governu No 44/II konabá segundu alterasaun ba Lei No 6/2006, Lei Eleitorál ba Parlamentu Nasionál.

Lei ne’e rasik pasa iha diskusaun espesialidade iha tuku 18.00 lorokraik ho votus afavor 39, kontra 0 no absteinsaun 1.

Diretór Interinu JSMP, Casimiro dos Santos hatete, importánsia ba alterasaun lei ba Eleisaun Parlamentu Nasionál ne’e mak tenki refleta duni situasaun Timór Lesté no responde ba rekomendasaun husi Misaun Observasaun Eleitorál Uniaun Europeia (EUEOM) nian no relatóriu sira konabá eleisaun husi Ekipa Sertifikasaun Eleitorál husi Nasoens Unidas no Internasionais ne’ebé uluk halo monitorizasaun ba prosesu eleisaun 2007 nune’é la bele akontese fallansu fila fali iha elisaun jerál 2012.

Tuir proposta alterasaun ne’ebé Programa Observasaun Parlamentu JSMP hetan husi sekretariadu apoiu Parlamentu katak iha totál artigu hamutuk 19 mak Governu aprezenta hanesan Proposta atu halo alterasaun iha Parlamentu Nasionál.

Proposta lei ne’e, aprezenta husi Ministru Administrasaun, Estatál Ordenamentu Teritóriu Arcângelo Leite no Diretór Jerál Sekretariadu Tékniku Administrasaun Eleitorál (STAE),Tomas Cabral. Durante diskusaun, membrus parlamentu sira kestiona maka’as liu ba artigu 22o,33o, 39o ho 45o hodi halo mós proposta alterasaun hamutuk 13.

Husi proposta alterasaun sira ne’e 9, mak passa iha votasaun espesialidade no 4 mak prejudikadu ka la passa iha votasaun. Entertantu husi proposta Governu nian 8 mak prejudikadu ka la passa no 11 passa iha votasaun.

Ba artigu 39o konabá bulletin de votu, maski governu la husu halo alterasaun, maibé Partidu CNRT halo proposta alterasaun (proposta no3) atu aumenta tan palavra monta fotografia iha alinea 2) ba kandidatu ne’ebé sai figura ba primeíru lugar iha lista admitida ba eleisaun ne’ebé povu atu hili.

Maibé Bankada FRETILIN, PD, PSD no ASDT sira seluk la konkorda ho razaun elisaun iha nasaun hotu avansa deit ho bandeira ka imblema husi partidu polítiku, tanbá ne’e iha finál proposta CNRT nian la pasa ho votus kontra 30, avafor 18 no absteinsaun 1. (*/CJITL)