PN LABELE DEMORA LEI TRABALHADORES

JOSEFA PARADA – SUARA TIMOR LOROSAE – 03 maio 2011

DILI - Konsidera durante ne’e trabalhadores halao servisu la ho dignu, tamba nee governu liu husi Sekretaria Estadu Formasaun Professional no Empregu (SEFOPE), ejiji Parlamentu Nasional (PN) atu aprova lalais kodigu laboral nebee maka dadaun iha PN, hodi garante direitu trabalhadores.

“Hau nia parabens ba maluk servisu nain sira hotu. Ita hein katak ita tenki hakaas aan servisu hamutuk nafatin i ami halo ona esforsu hotu-hotu liu-liu lei nebee maka bele fo protesaun ba trabalhadores sira i kodigu laboral agora iha PN  iha diskusaun iha komisaun para atu bele aprova,” koalia SEFOPE, Bendito Freitas ba jornalista sira iha Dili Convention Center (DCC), Merkado Lama-Dili,  relasiona ho loron mundial trabalhadores nebee monu iha loron Domingu (01/05).

Tuir nia hanoin, tempu too ona  fo atensaun ba direitu  trabalhadores nebee ke servisu iha kompania privada ke nudar nain ba kompania ka fo servisu ema sempre fo salariu kiik liu ba trabalhadores, inklui hasai trabalhadores tuir nia hakarak inklui laiha osan over time. 

 
Haree ba kestaun nee hotu, atu bele garantia protesaun, defeza ba direitu trabalhadores sira liu-liu hetan servisu ne’ebe ke dignu, SEFOPE halo ona revizaun ba kodigu laboral no aprezenta tiha ona iha Parlamento Nasional hodi halo diskusaun antes aprova.

 “Ita hein katak ilustris de­putadus sira bele aselera prosesu ida nee ba nia aprovasaun atu nunee direitu, deveres, obriga­soens trabalhadores sira bele hetan fatin, bele respeitu, liu-liu sira mos bele fo sira nia kontribuisaun ba servisu dezenvolvimentu nasional hanesan servisu nain,” dehan Bendito.

Iha okaziaun nee, nia hatete mos katak, SEFOPE iha ona dadus kona ba salariu minimu trabalhadores ninian nebee maka SEFOPE foti liu husi rezultadu final peskiza, maibe nia parte la fo salariu minimu hira no identifika iha kompania nebee.

Koodenador Jeral Front Trabaladores Maubere (FORAM), Francisco Martins da Silva, hatete katak Loron ne nudar “Loron Luta” nian husi ema kbiit laek nebee ho konsiensia moral, sosial no politika deklara ba orgaun soberanu tomak iha Timor-Leste hodi tau preokupasaun ba vida kondisaun nebee Trabalhadores no Kamponezes sira infrenta. Kondisaun hirak ne mak hanesan eksplorasaun, intimidasaun, diskriminasaun husi ema ba ema no laiha sistema nebee justu hodi valoriza servisu nain sira, hanesan autor prinsipal ba dezenvolvimentu nasional.

 Francisco esklarese tan katak, haree ba realidade sosial, ekonomika nebee dau-dauk massas trabalhadores no kamponezes Maubere hasoru karakterizadu husi diskriminasaun oin-oin nudar legado mentalidade kolonial no governasaun ke la partidariza kauza ema kiak sira nian. Sente mos kona ba paralizasaun seitor industrial no agrikula–pekuaria hodi aprofunda klase nebee maka ami reprezenta no pertense. Sensibilizadu ho dez-igualdade sosial no ekonomia no menus partisipasaun klase trabalhadores no kamponezes iha vida politika iha dezenvolvimentu Nasaun.

“Fundamenta ba  inspirasaun ami luta ba klase trabalhador no kamponeze nia interese no direitu politiku ekonomiku, maka ho firmi ami deklara ba Orgaun Estadu hodi konsidera kestaun no pontuais nebee sei fo benifisiu apropriadu hodi responde ba prosperidade vida  trabalhadores no kamponezes maka Kria lei ba Salariu Minimu no lei ba Seguransa, Uma, Asuransi Saude, no Ijiene no husu ba PN atu halao konsultasaun publiku direitamente ho trabalhadores  kona ba lei kodigu laboral,” dehan Francisco.

Iha fatin la hanesan, tra­bal­hadores nebee servisu iha area Loja Kolmera-Dili, Joana Men­des, hateten, nudar trabal­ha­dores husu PN diskuti lalais lei trabalhadores hodi aprova.

“Ami nudar servisu nain husu ulun boot sira para Lei ida be trabalhadores nee la bele demora, tamba se demora lei sira nee entaun ema nebee maka fo ami servisu sei halo buat hotu tuir sira nia hakarak deit i ami konta terus nafatin,” nia hateten.

Razaun husu aprova lalais lei refere, tamba oras nee dadaun,  sasan baziku ninia folin kontinua sae makaas iha merkadoria, nunee salariu nebee simu la too ba sira ninia nesesidades ba fulan ida nian.

“Hau senti ita boot sira mos hatene fos nia folin agora ne’e U$ 18, 20 ,22, 23, 24  no mina nia foin hanesan 5 liter deit be uluk U$ 5/75 cent no balun U$ 6 agora sae ba U$ 7,50 cent $ 7,75 cent no folin sasan kikoan sira seluk mos sae hotu tan ida ne’e maka ami preokupa los ho ami nia salariu U$ 80 ne’e,” dehan nia.

Entretantu servisu nain husi Kompania Mira-Mar nebee lakohi publika nia identidade ba Diario nee, haktuir, durante nee nia servisu iha komapania refere, hanesan hit blok ka lalin blok. Nia husu atu lei trabalhadores persiza fo prioridade, nunee trabalhadores hetan direitu tuir servisu nebee ke halo.

“Lei trabalhador ami seidauk hatene ninia prosesu too ona iha nebee, mas ita boot sira dehan iha ona Parlamento, entaun ami husu ba reprezentante povu iha parlamento para diskuti lei ida nee hodi aprova tamba durante nee ami hanesan servisu ho ema, terus liu,” koalia trabalhador nee. Nia haktuir, maske durante nee simu salariu uitoan, la sufisienti ba nesesidades familia, maibe nia parte hateten hakarak lakohi tenki fo an ba servisu, tamba laiha servisu. Jay