Fos ho Marka MTCI Hotu, Gil Alves Kria Modelu Foun

COSTA GOMES – CJITL - 24 abril 2011

Ermera Flash, Fos governu ne'ebe antes ne'e ho marka MTCI oras ne'e, Ministeriu Torismu Komersiu no Industria, ne'ebe lidera husi Gil da Costa Alves troka tiha ona ba modelu foun ho marka emblema RDTL.

Urbano Moreira funsionariu ida husi Governu nian ne'ebe tula fos governu nian ba distritu Ermera, Terca feira semana kotuk hateten katak fos ne'ebe uluk ho marka MTCI ne'e hotu ona tanba ne'e agora fos ho marka foun fali ho simbolu RDTL mak sirkula fali ona.

Ami distribui ona fos ne'e ba distritu ha'at hanesan Same, Ainaro, Suai no Ermera, kada distritu ida ami iha deit loron tolu atu bele fa'an fos iha distritu ida – idak hafoin ne'e ami sei muda ba distritu seluk” Moreira hateten.

Kada distritu ida hetan toneladas 50 no ami fa'an ba sub distritu hotu – hotu, maibe fatin ne'ebe dalan ladiak ami sei la tama to'o povu nia let” nia konfirma.

Tuir Moreira katak fos ne'e sira fa'an ba povu direitamente husi kareta leten, no kada saka iha kilograma 25 no fa'an ho folin $15 dolar.

Tuir observasaun CJITL online iha Ermera hatudu katak prosesu fa'an fos ne'e hala;o tutuir dalan no iha deit kareta leten.

Komunidade ne'ebe hakarak hola fos bele hola direitamente ba funsionariu sira ne'ebe tula fos.

Iha mos akompanhamentu husi Polisia Nasional Timor Lorosa'e – PNTL distritu Ermera nian.