Jornalista Timor Leste Kari Aifunan ba Monumentu Sander Thoenes

DOMINGOS DA SILVA – CJITL

CJITL flash, Tera feira, horseik (3/5) jornalista Timor Leste selebra loron mundial ba liberdade ba imprensa ho kari aifunan ba monumentu jornalista Sander Robert Thoenes ne'ebe tropa indonezia husi Bataylon 745 oho iha igreja Becora nia oin, iha loron 21 Setembru 1999.

Hola parte iha seremonia kari aifunan ne'e jornalista nasional husi media elektronika no imprime no konta mos ho partisipasaun estudante Universidade Nasional Timor Lorosa'e – UNTL departementu komunikasaun sosial.

Sander Thoenes nu'udar jornalista holanda nian ida ne'ebe servisu ba Financial Times no mai mate iha Timor Leste iha Setembru 1999,semana rua hafoin misaun ONU iha Timor Leste fo sai rezultado Referendum ne'ebe rezulta independensia ba povu Timor.

Iha durante prosesu kari aifunan ne'e, Frances Suni, Dosente UNTL no Julio Gil da Silva Guterres, Direitor CJITL konta fila fali istoria oinsa Sander Thoenes halo nia servisu to'o mai mate iha Timor Leste.

Sander Thoenes mate klosan ho idade 29. (Domingos da Silva/CJITL)