JOSEFA PARADA – SUARA TIMOR LOROSAE – 28 abril 2011
DILI - Komandante Investigasaun Nasional, Calistro Gonzaga, afirma, Polisia Nasional Timor-Leste (PNTL) prontu atu haree see deit mak lori tama aimoruk droga mai paiz ida nee. Tamba aimoruk droga bele estraga joven sira nia futuru.
Gonzaga haktuir, tempu hirak liu ba, sira konsege kaer ona Timor oan ida nebee sempre halao transaksi aimoruk droga. Needuni, see deit mak iha intensaun atu halao bisnis ida nee, PNTL sei la fo toleransia.
“Uluk ami konsege kaer duni Timor oan ida nebee sempre ba liur sosa aimoruk nee hodi mai konsumu iha rai laran. Ita haree ba laduun diak, tamba ema nebee uza aimoruk nee bele estraga nia aan rasik, liu-liu ba foinsae sira,” Gonzaga haktuir ba STL iha nia servisu fatin, Kuartel Jeral PNTL, Kaikoli-Dili, Kuarta (27/04).
Atu bele efetivu liu tan, Calistro mos husu partisipasaun no kolaborasaun husi media no komunidade sira. “Presiza media sira nia kolaborasaun, atu servisu hamutuk ho polisia hodi haree ema nebee lori droga tama mai iha Timor-Leste. Polisia mesak deit, labele halo buat ida. Presiza mos komunidade nia partisipasaun, tamba komunidade mak koinese liu ema nebee hela iha bairo-bairo,” Calistro hateten.
Ba asuntu droga, João Pereira, nudar joven nebee hela iha Halilaran, haktuir, durante nee nia rona duni katak iha ema Indonesia balun mak komesa hatama aimoruk droga. Tamba nee, nia husu ba polisia sira atu servisu makaas liu tan iha fronteira.
“Hau hanesan joven ida, bainhira hau rona dehan iha Timor nee, iha ema Indonesia balun mak komesa hatama aimoruk nebee ema dehan droga. Hau husu ba maluk polisia sira nebee servisu iha batas, atu labele matan dukur, tenke matan moris neon nain,” dehan João.
Nunee mos Joana Tilman, sidadaun Matadoro, garante katak, sira prontu atu kolabora ho autoridade kompetente, bainhira rona issu kona ba aimoruk droga iha sira ninia bairo. “See karik iha ami nia bairo nee mak iha ema ruma diskunfia faan ka konsume droga,ami rasik mak sei hatoo ba autoridade lokal para bele haree ou kontrola,” Joana promete. Son
Sem comentários:
Enviar um comentário