ALTERASAUN LEI ELEITORAL PR, LADUUN SIGNIFIKANTE

JOSEFA PARADA – SUARA TIMOR LOROSAE – 28 abril 2011

DILI – Governu liu husi Mi­nis­teriu Administrasaun ESTATAL no Ordenamentu Territoriu (MAEOT) ho Parlamentu Na­sional (PN) halo diskusaun no votasaun espesialidade segun­du ba alteirasaun lei no. 7/2006 sobre Lei Eleitoral Prezidente Republika (PR).

Tuir Deputadu Arão Noe de Jesus C. Amaral husi Bankada CNRT, proposta alterasaun ba lei eleitoral PR nee laduun signi­fi­kante. Tamba iha alterasaun ba­lun laos fundamental, maibe al­terasaun tekniku deit, atu oinsa bele halo eleisaun diak liu tan.

“Saida maka altera iha lei nee laduun signifikante, maibe so termus tekniku deit atu hadia pa­ra bele kolera ho situasaun atual,” hateten Arão ba STL iha PN, Kuarta (27/04).

Iha fatin hanesan, Depu­ta­du Mario Viegas Carrascalão hak­tuir, diskusaun nee foka liu ba   reprezentasaun minima husi kan­didatu sira. Balun dehan, kan­di­datu sira presiza hetan apoiu hu­si ema 5000, no seluk fali hakarak too maksimu 7500. “Lalika tau 7500, tamba Konstituisaun hate­ten, minimu 5000. Hau hanoin alterasaun ba baze, diskuti bar-barak iha PN  no konaba fali proposta husi governu mos ladun altera,” komenta Mario.

Husi Bankada Fretilin, De­putadu Joaquim dos Santos ha­noin, total asinatura ba kandi­datu  Prezidente, Konstituisaun limite 5000.

“Iha kontradisaun uitoan iha artigu 15. Proposta husi governu ninian nee mesmu iha parte balun obedese konstituisaun, maibe artigu 15 nee bele provoka kandidata mosu bar-barak, tamba laiha marjen sensaun entre husi minimu 5000 ho maximu 7500,” dehan Joaquim.

Nunee mos Ministru Administrasaun EATATAL no Ordenamentu Territoriu, Ar­cangelo Leite esplika, governu aprezenta proposta ho inten­saun atu hadia no mos atu fasilita orgaun eleitorais sira servisu diak liu tan. Proposta sira nebee aprezenta nee, bazeia ba espe­rensia sira nebee mak akontese liu husi eleisaun 2004, 2007 no 2009. Bazeia ba esperensia sira nee, lisoens balun nebee maka hetan, mak governu aprezenta proposta atu altera lei 3.

“Esperensia nee la signifika dehan sala, esperensia nee buat balun nebee dalaruma bele fasilita orgaun eleitorais sira, atu servisu. Proposta governu nian, atu reforsa liu tan lei nebee maka iha no halo revizaun ba artigu balun nebee maka ami konsidera hanesan nesesariu. Nee artigu barak la halimar no lei 3 kedas,” Ministru Arcangelo esplika. Jay