JOSEFA PARADA – SUARA TIMOR LOROSAE – 03 maio 2011
DILI - Prezidenti Republika, Jose Ramos Horta, rekoinese kualidade lideransa Sekretariu Jeral Fretilin, Dr. Mari Alkatiri nian. Tamba nee, Horta dehan, kuandu Mari Alkatiri hakarak kandidata aan ba Prezidenti Republika, nia la duvidas, basaa Alkatiri nudar ema ida nebee kualidade duni atu kaer nasaun ida nee.
“Se Maun Boot Mari Alkatiri hakarak kandidatu ba Prezidenti Republika no povu hili, hau hanoin nia ema ida nebee ho kualiadade para kaer nasaun nee ho diak,” deklara Prezidenti Horta ba jornalista sira iha salaun Dili Convention Center, Kaikoli-Dili, Sesta (29/04).
Maski nunee, Horta haktuir, nia nunka rona husi Alkatiri atu tau naran ba kandidatura Prezidenti Republika. Kuandu Alkatiri maka kandidatu karik no povu maka hili karik, nia sei sai prezidenti ida diak, sei buka mos hametin dame iha nasaun nee nia laran.
Entretantu Sekretariu Jeral Partidu Fretilin, Mari Alkatiri, hatete, karik nia kandidatu aan ba Prezidenti Republika, nia sei konsulta ho Premeiru Ministru, Kay Rala Xanana Gusmão no bispu sira.
“Hau sei konsulta ho PM Xanana, bispu sira, se kuandu sira hakarak ka lae maka hau sei fo sai ba publiku ka nasaun,” komenta Mari.
Akademika Universidade Nasional Timor Loro Sa’e, Jose da Cruz, hatete, la sala kuandu Sekretariu Jeral Partidu Fretilin nee hakarak kandidata nia aan ba Prezidenti Republika iha eleisaun 2012 mai.
Tuir nia haree, Alkatiri nudar figura diak ida, atu sai Prezidenti Republika iha tinan oin mai. “Hanesan estudante, hau hanoin la sala kuandu Dr. Mari Alakatiri kandidata aan sai Prezidenti Republika. Nia laos ema foun ida iha nasaun nee. Maibe agora depende ba nia, nia hakarak duni kandidata ba PR ka lae, keta halo boatus deit karik,” hatete Jose. Jin
Sem comentários:
Enviar um comentário